अमरावती : काही दिवसांपूर्वी शासनाच्यावतीने सर्वसामान्यांसाठी स्वस्त दरात वाळू उपलब्ध करून देण्याचा धोरणात्मक निर्णय घेण्यात आला होता. ज्यामध्ये 600 रुपये ब्रासप्रमाणे रेती उपलब्ध करून दिली जात असल्याचे दावे प्रशासनाकडून करण्यात आले. नुकताच पश्चिम विदर्भातील मंगरूळ दस्तगीर येथील वाळू डेपोचे उद्घाटन करण्यात आले. त्यामुळे आता सर्वसामान्यांना अगदी माफक दरात वाळू उपलब्ध होण्याचा मार्ग मोकळा झाला आहे.
त्यामुळे अवैध पद्धतीने होणाऱ्या वाळूच्या तस्करी आणि त्यातून सर्वसामान्यांना मोजावे लागणाऱ्या ज्यादा पैसे, अशा प्रकारांना आळा बसणार आहे. विशेष बाब म्हणजे घरकुल लाभार्थ्यांना या डेपोच्या माध्यमातून पाच ब्रास रेती मोफत मिळणार आहे.
गेल्या महाराष्ट्र दिनी वाळूच्या अवैध वाहतुकीसह तस्कारीला आळा घालण्यासाठी सरकारने नव्या वाळू धोरणाची घोषणा करत, थेट 600 रुपये ब्रास प्रमाणे वाळू अधिकृत डेपोवरून विकण्याचा निर्णय घेतला होता. त्यासाठी सर्व राज्यातील जिल्हाधिकाऱ्यांना सूचना महसूलमंत्री राधाकृष्ण विखे पाटील यांनी दिल्या होत्या. बहुतांश भागात अद्याप रेती डेपो सुरू न झाल्याचे चित्र आहे.
अमरावती जिल्ह्यासाठी निश्चित केलेल्या एकूण 44 वाळूघाटांच्‍या 14 वाळू डेपोंसाठी ई-निविदा पद्धतीने निविदा मागविण्यासाठी जिल्‍हाधिकारी कार्यालयामार्फत गेल्या 23 ऑक्टोबरला सूचना प्रसिद्ध करण्यात आली होती. त्यानुसार 14 वाळू डेपोंपैकी जळगाव मंगरुळ (ता. धामणगाव रेल्वे), चांदूर ढोरे (ता. तिवसा) आणि तलई (ता. धारणी) येथे तीन किंवा त्यापेक्षा जास्त निविदा प्राप्त झालेल्या होत्या. तीन वाळू डेपोंच्‍या व्‍यतिरिक्‍त इतर 11 वाळू डेपोंसाठी ई-निविदेला 8 नोव्हेंबरपर्यंत मुदतवाढ देण्याचा निर्णय घेण्यात आला. मात्र अजून देखील हा प्रश्न निकाली लागला नाही.
