Amravati Crime : अमरावती: अमरावती जिल्ह्यातील परतवाडा परिसरातून एक अत्यंत धक्कादायक प्रकार समोर आला आहे. सोशल मीडियाच्या माध्यमातून अल्पवयीन मुलींशी मैत्री करून त्यांचे अश्लील फोटो आणि व्हिडिओ तयार करून ते प्रसारित करणाऱ्या एका 19 वर्षीय तरुणाला पोलिसांनी अटक केली आहे. अयान अहमद तन्वीर अहमद असे या आरोपीचे नाव असून, त्याच्या या कृत्यामुळे परिसरात मोठी खळबळ उडाली आहे. पोलिसांनी या प्रकरणी पोक्सो आणि माहिती तंत्रज्ञान कायद्यांतर्गत गुन्हा दाखल केला आहे.
मिळालेली माहिती अशी की, परतवाडा पोलीस ठाण्याच्या हद्दीत काही मुलींचे आणि एका तरुणाचे आक्षेपार्ह व्हिडिओ आणि फोटो सोशल मीडियावर व्हायरल होत असल्याची माहिती पोलिसांना मिळाली होती. पोलीस अधीक्षक कार्यालयाने या घटनेचा तपास केला असता धक्कादायक वास्तव समोर आले. आरोपी अयान याने सोशल मीडियाच्या मदतीने अनेक मुलींशी ओळख वाढवली होती. त्यानंतर त्याने या मुलींना आपल्या जाळ्यात ओढून त्यांच्या इच्छेविरुद्ध अश्लील चित्रीकरण केले. हे फोटो आणि व्हिडिओ त्याने सोशल मीडियावर टाकून संबंधित मुलींची बदनामी करण्याचा प्रयत्न केला.
प्राथमिक तपासात या सर्व पीडित मुली अल्पवयीन असल्याचे समोर आले आहे. या प्रकरणात सुमारे 180 हून अधिक मुलींचे व्हिडिओ प्रसारित करण्यात आल्याचा संशय व्यक्त केला जात आहे, ज्यामुळे प्रकरणाचे गांभीर्य प्रचंड वाढले आहे. पोलीस अंमलदार निलेश काळे यांच्या तक्रारीवरून परतवाडा पोलिसांनी गुन्हा दाखल केला असून आरोपीला तातडीने ताब्यात घेतले आहे. पोलिसांनी त्याचा मोबाईल फोन जप्त केला असून त्यामध्ये नेमके किती आणि कोणाचे व्हिडिओ आहेत, याचा सविस्तर तपास आता सायबर सेलच्या मदतीने केला जात आहे.
सध्याच्या काळात तरुण पिढी सोशल मीडियाचा वापर मोठ्या प्रमाणावर करत आहे, मात्र त्याचा असा चुकीचा वापर करून मुलींची फसवणूक होण्याचे प्रमाण वाढले आहे. पालकांनी आपल्या मुलांच्या मोबाईल वापराकडे आणि त्यांच्या मित्रमैत्रिणींकडे लक्ष देणे गरजेचे झाले आहे. या घटनेमुळे अमरावती जिल्ह्यात भीतीचे वातावरण असून पोलिसांनी अशा प्रवृत्तींविरुद्ध कठोर पावले उचलण्याचे आश्वासन दिले आहे. आरोपीला न्यायालयात हजर केले जाणार असून पोलीस या प्रकरणातील अधिक दुवे शोधण्याचा प्रयत्न करत आहेत.
