Akola News: अकोला : जिल्ह्यातील खिरपुरी बुद्रुक ग्रामपंचायतीचा धक्कादायक प्रकार समोर आला आहे. गावाला पाणीपुरवठा करणाऱ्या टाकीत एक माकड मृत अवस्थेत चार दिवस पडून असल्याचे आढळले. तरीही त्याच टाकीतून ग्रामस्थांना चार दिवस घाण आणि दुर्गंधीयुक्त पाणीपुरवठा करण्यात आला. हा प्रकार उघड झाल्यानंतर ग्रामस्थांमध्ये तीव्र संताप व्यक्त केला जात आहे.
मिळालेल्या माहितीनुसार, काही दिवसांपासून गावातील नळांमधून येणाऱ्या पाण्याला तीव्र दुर्गंध येत होता. पाण्याचा रंगही बदललेला दिसत होता. त्यामुळे ग्रामस्थांनी पाणी टाकीची तपासणी केली. तपासणीदरम्यान टाकीत माकड मृत अवस्थेत आढळले. हा प्रकार चार दिवसांपासून सुरू असल्याचे समोर आले आहे.
या घटनेमुळे ग्रामस्थांच्या आरोग्यावर गंभीर परिणाम होण्याची शक्यता व्यक्त केली जात आहे. पिण्याच्या पाण्याची अशी दुर्दशा झाल्याने ग्रामस्थांनी ग्रामपंचायत प्रशासनाविरोधात नाराजी व्यक्त केली आहे. ग्रामसेवक, सरपंच आणि संबंधित कर्मचाऱ्यांवर कारवाई करण्याची मागणी करण्यात येत आहे.
घटना उघडकीस आल्यानंतर ग्रामपंचायतीकडून पाणी टाकीची स्वच्छता करण्यात आली. त्यानंतर गावात पुन्हा पाणीपुरवठा सुरू करण्यात आला आहे. मात्र, इतक्या मोठ्या हलगर्जीपणामुळे ग्रामस्थांच्या जीवाशी खेळ झाल्याची भावना व्यक्त होत आहे.
दरम्यान, या घटनेमुळे ग्रामीण भागातील पाणीपुरवठा व्यवस्थेवर प्रश्नचिन्ह निर्माण झाले आहे. अशा प्रकारच्या घटना टाळण्यासाठी प्रशासनाने नियमित तपासणी करणे गरजेचे असल्याचे मत नागरिकांकडून व्यक्त होत आहे. या प्रकरणाचा पुढील तपास सुरू असून दोषींवर योग्य ती कारवाई करण्याची मागणी ग्रामस्थांनी केली आहे.
