बारामती : बारामती परिसरात एका 23 वर्षीय तरुणाचे अपहरण करून त्याचा जीव घेण्याचा प्रयत्न झाल्याची धक्कादायक घटना उघडकीस आली आहे. पत्नीशी मोबाईलवर संपर्क ठेवल्याच्या संशयातून दोन जणांनी हा प्रकार केल्याचे तपासात समोर आले आहे. मात्र, अपहरण झालेल्या तरुणाने प्रसंगावधान राखत आरोपींच्या तावडीतून सुटका करून घेतली. त्यानंतर पोलिसांनी तांत्रिक तपास आणि पाठलाग करून दोन्ही आरोपींना अटक केली.
पोलिसांच्या माहितीनुसार, ओंकार प्रकाश भोसले (वय 27) आणि तन्मय सुधीर साळुंखे (वय 20) अशी अटक करण्यात आलेल्या आरोपींची नावे आहेत. शनिवारी 6 जून रोजी सायंकाळी त्यांनी ऋषिकेश नावाच्या तरुणाला सुपा-मोरगाव मार्गावरील एका हॉटेलजवळ बोलावले. त्यानंतर फॉरेस्ट गेट परिसरात त्याला पिस्तूल आणि चाकूचा धाक दाखवत जबरदस्तीने स्विफ्ट कारमध्ये बसवून पुण्याच्या दिशेने नेण्यात आले.
प्रवासादरम्यान आरोपींनी त्याच्यावर चाकूने हल्ला करण्याचा प्रयत्न केला. बचाव करताना चाकू त्याच्या डाव्या भुवईजवळ लागल्याने तो जखमी झाला. पुढे दिवेघाट परिसरात नेऊन त्याला मारहाण करण्यात आली. मात्र, अंधाराचा फायदा घेत ऋषिकेश आरोपींच्या तावडीतून पळून जाण्यात यशस्वी झाला. त्याने मित्रांशी संपर्क साधून पोलिसांना माहिती दिली.
घटनेची माहिती मिळताच सहाय्यक पोलीस निरीक्षक नवसरे यांच्या नेतृत्वाखाली विशेष पथक रवाना करण्यात आले. जेजुरी, सासवड, उरुळीकांचन आणि यवत पोलिसांना नाकाबंदीच्या सूचना देण्यात आल्या. मोबाईल कॉलचे तांत्रिक विश्लेषण केल्यानंतर संशयितांचे ठिकाण दिवेघाट परिसरात असल्याचे निष्पन्न झाले.
यानंतर पोलिसांनी सासवड पोलिसांच्या मदतीने झेंडेवाडी परिसरात आरोपींच्या स्विफ्ट कारला अडवून दोघांना ताब्यात घेतले. या प्रकरणी सुपा पोलीस ठाण्यात गुन्हा दाखल करण्यात आला आहे. न्यायालयाने दोन्ही आरोपींना 4 दिवसांची पोलीस कोठडी सुनावली असून पुढील तपास पोलीस उपनिरीक्षक जिनेश कोळी करत आहेत.
