जालना: पुण्याला जाण्यासाठी घराबाहेर पडलेल्या 36 वर्षीय तरुणाचा जालना बसस्थानक परिसरातील एका खासगी लॉजमध्ये मृतदेह आढळून आल्याने परिसरात खळबळ उडाली. या घटनेची माहिती मिळताच पोलिसांनी घटनास्थळी पोहोचून पाहणी केली. याप्रकरणी आकस्मिक मृत्यूची नोंद करण्यात आली असून पुढील तपास सुरू आहे.
मृत व्यक्तीचे नाव निवृत्ती भागुजी फरताडे असून ते तुपेवाडी, ता. जालना येथील रहिवासी होते. बुधवारी ते पुण्याला जाण्यासाठी घरातून निघाले होते. मात्र प्रवासाला उशीर झाल्याने त्यांनी जालना बसस्थानकाजवळील एका लॉजमध्ये रात्री मुक्काम करण्याचा निर्णय घेतला. त्यांनी लॉजमध्ये खोली बुक केली आणि त्यानंतर खोलीत जाऊन दरवाजा आतून बंद केला.
दुसऱ्या दिवशी बराच वेळ उलटूनही खोलीचा दरवाजा उघडला गेला नाही. त्यामुळे लॉजमधील कर्मचाऱ्यांना संशय आला. नातेवाईकांच्या मदतीने दरवाजा ठोठावून प्रतिसाद मिळतो का, हे पाहण्यात आले. मात्र आतून कोणतीही हालचाल जाणवली नाही. त्यानंतर तातडीने 112 क्रमांकावर संपर्क साधून पोलिसांना माहिती देण्यात आली.
पोलिसांचे पथक घटनास्थळी पोहोचल्यानंतर खोलीचा दरवाजा उघडण्यात आला. त्यावेळी फरताडे मृतावस्थेत आढळले. पोलिसांच्या प्राथमिक पाहणीत खोलीत सलाईनची सुई आणि औषधाची बाटली आढळल्याची माहिती आहे.
फरताडे यांना काही शारीरिक त्रास असल्याने ते तणावात असल्याची माहिती समोर येत आहे. मात्र त्यांच्या मृत्यूमागील नेमके कारण अद्याप स्पष्ट झालेले नसून पोलिस अधिक तपास करत आहेत.
