मांडवगण फराटा : मांडवगण फराटा (ता.शिरूर) येथील महाविद्यालय आणि शिक्षण संस्थेविरोधात विद्यापीठ स्तरावर तसेच विविध ठिकाणी खोट्या तक्रारी करण्याची तसेच माहितीच्या अधिकाराचा गैरवापर करण्याची आणि व्हॉट्सॲप स्टेटसच्या माध्यमातून विविध शिखर परिषदांची भीती दाखविण्याची धमकी देत तब्बल 70 लाख रुपयांची खंडणी मागितल्याचा धक्कादायक प्रकार समोर आला आहे. या प्रकरणी शिरूर पोलिसांनी संतोष यशवंत आडसूळ (वय 36, रा.बोरीपारधी, ता.दौंड, जि.पुणे) याला अटक केली आहे. न्यायालयाने त्याला 14 दिवसांची न्यायालयीन कोठडी सुनावली असून त्याची रवानगी येरवडा कारागृहात करण्यात आली आहे.

याप्रकरणी शरद वसंतराव फराटे (वय 48 व्यवसाय दूध डेअरी व शिक्षण विभाग, रा.मांडवगण फराटा, ता.शिरूर, जि.पुणे) यांनी शिरूर पोलीस ठाण्यात फिर्याद दाखल केली आहे. पोलिसांनी दिलेल्या माहितीनुसार, संतोष आडसूळ याने 20 जुलै 2025 आणि 16 जून 2026 रोजी बोरी पारधी तसेच मांडवगण फराटा येथील वसंतराव फराटे पाटील कला, वाणिज्य व विज्ञान महाविद्यालयाच्या प्रवेशद्वारावर खंडणीची मागणी केल्याचा आरोप फिर्यादीमध्ये फिर्यादीने केला आहे.
महाविद्यालयाची विद्यापीठ स्तरावर तसेच संबंधित शिक्षण विभागाकडे पत्राद्वारे आणि ई-मेलद्वारे खोट्या तक्रारी करू नयेत, माहितीच्या अधिकाराचा वापर करून वैयक्तिक माहिती मागवू नये, तसेच व्हॉट्सॲप स्टेटसच्या माध्यमातून विविध शिखर परिषदांची भीती दाखवून संस्थेला वेठीस धरू नये, यासाठी आरोपीने ७० लाख रुपयांची मागणी केल्याचे फिर्यादीत नमूद करण्यात आले आहे.

या प्रकरणी शिरूर पोलीस ठाण्यात खंडणीचा गुन्हा दाखल करण्यात आला आहे. पोलिसांनी मंगळवारी (ता.17) सायंकाळच्या दरम्यान आरोपीला अटक केली. त्यानंतर न्यायालयीन आदेशानुसार त्याची 14 दिवसांसाठी न्यायालयीन कोठडीत रवानगी करण्यात आली.
दरम्यान, आरोपी संतोष आडसूळ याच्याविरुद्ध यापूर्वीही शिरूर पोलीस ठाण्यात सन-2025मध्ये गुन्हा दाखल असल्याची माहितीही पोलिसांनी दिली आहे. या गुन्ह्याचा पुढील तपास पोलीस उपनिरीक्षक दिलीप पवार हे शिरूरचे पोलीस निरीक्षक विनोद पाटील यांच्या मार्गदर्शनाखाली करीत आहेत.
“सुमारे 70 लाखांच्या खंडणीची गंभीर मागणी होऊनही आरोपीला अटक करण्यासाठी पोलिसांना तब्बल चार महिन्यांहून अधिक कालावधी लागल्याने पोलिसांच्या तपासाच्या गतीवर आणि कारवाईतील विलंबावरून परिसरात उलटसुलट चर्चांना उधाण आले आहे.”






