बारामती: शहरातील एमआयडीसी भागातील शिवशंभोनगर परिसरात आज सायंकाळी गोळीबाराचा थरार घडला. येथील स्थानिक उद्योजक राजन कोळेकर यांच्या निवासस्थानाजवळ उभ्या असलेल्या चारचाकी वाहनाला लक्ष्य करत अज्ञात हल्लेखोरांनी गोळ्या झाडल्या. या घटनेमुळे परिसरातील नागरिकांमध्ये काही काळ भीतीचे आणि खळबळीचे वातावरण निर्माण झाले होते. सुदैवाने, या हल्ल्यात कोणतीही जीवितहानी झालेली नाही किंवा कोणीही जखमी झालेले नाही, त्यामुळे मोठा अनर्थ टळला आहे.

मिळालेल्या माहितीनुसार, आज सायंकाळी 6 वाजण्याच्या सुमारास हा प्रकार घडला. शिवशंभोनगर येथे राजन कोळेकर यांचे घर आहे. त्यांच्या घराबाहेर उभ्या असलेल्या गाडीजवळ काही अनोळखी व्यक्ती आल्या आणि त्यांनी अचानक बंदुकीतून 2 राऊंड फायर केले. गोळीबाराचा मोठा आवाज झाल्याने आसपासचे रहिवासी घराबाहेर आले आणि परिसरात एकच गोंधळ उडाला. गोळीबार केल्यानंतर हल्लेखोरांनी घटनास्थळावरून पळ काढला.
हा प्रकार घडला त्या नेमक्या वेळी वाहनामध्ये कोणी बसले होते का, किंवा स्वतः उद्योजक राजन कोळेकर त्या ठिकाणी उपस्थित होते का, याबाबतची सविस्तर माहिती अद्याप स्पष्ट झालेली नाही. तसेच, या गोळीबारामागे हल्लेखोरांचा नेमका काय उद्देश होता आणि हा हल्ला कोणत्या कारणातून करण्यात आला, हे अद्याप गुलदस्त्यात आहे. व्यावसायिक वादातून हा प्रकार घडला की अन्य काही कारण आहे, याचा शोध घेतला जात आहे.

घटनेची माहिती मिळताच बारामती तालुका पोलिसांनी तातडीने घटनास्थळी धाव घेत पाहणी केली. पोलिसांनी परिसरातील नागरिकांची चौकशी सुरू केली असून, अज्ञात आरोपींचा माग काढण्यासाठी आजूबाजूच्या परिसरातील सीसीटीव्ही फुटेज तपासले जात आहेत. या प्रकरणी बारामती तालुका पोलीस ठाण्यात गुन्हा नोंदवण्याची प्रक्रिया सुरू असून, पोलीस अधिक तपास करत आहेत.






