उरुळी कांचन :हवेली तालुका खरेदी-विक्री संघाच्या अत्यंत चुरशीच्या संचालक मंडळ निवडणुकीत सहकारमहर्षी आण्णासाहेब मगर शेतकरी विकास पॅनेलने दणदणीत विजय मिळवत सहकार क्षेत्रात आपले निर्विवाद वर्चस्व सिद्ध केले आहे. संस्था प्रतिनिधी गटातील 10 जागांपैकी तब्बल सात जागांवर, तर वैयक्तिक सभासद प्रतिनिधी, महिला प्रतिनिधी, इतर मागास प्रवर्ग, भटक्या-विमुक्त जाती प्रवर्ग आणि अनुसूचित जाती-जमाती प्रवर्गातील सर्वच्या सर्व नऊ जागांवर विकास पॅनेलच्या उमेदवारांनी बाजी मारली. अशा प्रकारे एकूण 19 पैकी 16 जागांवर विजय मिळवत विकास पॅनेलने एकहाती वर्चस्व प्रस्थापित केले. तर प्रतिस्पर्धी आण्णासाहेब मगर परिवर्तन पॅनेलला अवघ्या तीन जागांवर समाधान मानावे लागले.

या निवडणुकीच्या निकालाकडे संपूर्ण हवेली तालुक्याचे लक्ष लागले होते. अत्यंत अटीतटीच्या झालेल्या या निवडणुकीत विकास पॅनेलने बहुतांश जागांवर विजय मिळवत विरोधी पॅनेलला मोठा धक्का दिला. मात्र, विकास पॅनेलचे प्रदीप खंडू आहिरे आणि तेजस नंदकुमार कोकाटे यांना पराभवाचा सामना करावा लागला. दुसरीकडे, परिवर्तन पॅनेलचे हवेली पंचायत समितीचे विद्यमान सदस्य कृषीराज ऊर्फ मनोज चौधरी आणि खरेदी-विक्री संघाचे माजी अध्यक्ष राजेंद्र खांदवे आणि तुषार कुटे यांनी विजय मिळवला.
दरम्यान, विविध प्रवर्गांत मिळालेल्या घवघवीत यशामुळे विकास पॅनेलची संघटनात्मक ताकद अधोरेखित झाली आहे. संस्था प्रतिनिधी गटापासून ते वैयक्तिक सभासद आणि राखीव प्रवर्गांपर्यंत मतदारांनी विकास पॅनेलला कौल दिल्याचे निकालातून स्पष्ट झाले आहे. या विजयामुळे हवेली तालुका खरेदी-विक्री संघाच्या आगामी कारभारात विकास पॅनेलची भूमिका निर्णायक ठरणार असून, संघाच्या नेतृत्वाची धुरा कोणाकडे जाणार, याकडे आता सहकार क्षेत्राचे लक्ष लागले आहे.

सहकारमहर्षी आण्णासाहेब मगर शेतकरी विकास पॅनेलचे विजयी उमेदवार
संस्था प्रतिनिधी : कल्याण अंकुश शिंदे, संजय सोपान गायकवाड, प्रकाश अमृत सावंत, युवराज पंडितराव कांचन, गुलाब भागुजी चौधरी, बाळासाहेब शिवाजीराव पोकळे, अश्विनी भोरडे
वैयक्तिक सभासद प्रतिनिधी : प्रशांत दत्तात्रय काळभोर, महेंद्र पाटीलबुआ दांगट, मधुकर रामदास घुले, शेखर सहदेव मस्के.
महिला प्रतिनिधी : सुनीता संदीप धुमाळ, सुरेखा अनंता भाडळे.
इतर मागास प्रवर्ग : संजय अमृतराव सातव.
भटक्या-विमुक्त जाती प्रवर्ग : मल्हारी दत्तात्रय केसकर.
अनुसूचित जाती-जमाती प्रवर्ग : सत्यवान दगडू गायकवाड






