पुणे : पुणे जिल्हा परिषदेच्या ग्रामीण भागातील शासकीय शाळांमध्ये शिकणाऱ्या 25 गुणवंत विद्यार्थ्यांना आता जागतिक दर्जाच्या विज्ञान आणि तंत्रज्ञानाचा प्रत्यक्ष अनुभव घेण्याची संधी मिळाली आहे. या आंतरराष्ट्रीय शैक्षणिक दौऱ्याचे यंदाचे हे दुसरे वर्ष असून, निवडलेले विद्यार्थी 20 नोव्हेंबर 2026 रोजी अमेरिकेसाठी रवाना होणार आहेत आणि 7 डिसेंबर 2026 रोजी मायदेशी परततील.

तब्बल 20 हजारांहून अधिक अर्जदारांमधून ‘आयुका’ संस्थेच्या तीन टप्प्यांतील कठीण निवड प्रक्रियेद्वारे या 25 विद्यार्थ्यांची निवड झाली आहे. दौऱ्यापूर्वी आयुकामध्ये त्यांना विशेष मार्गदर्शन करण्यात आले असून, एक वैज्ञानिकही त्यांच्यासोबत मार्गदर्शक म्हणून प्रवास करणार आहेत.
या 20 दिवसांच्या दौऱ्यात विद्यार्थी वॉशिंग्टन डी.सी., ऑर्लँडो आणि सॅन फ्रान्सिस्को येथील नामांकित संस्थांना भेट देतील. वॉशिंग्टन डी.सी. येथे स्मिथसोनियन राष्ट्रीय नैसर्गिक इतिहास संग्रहालय, राष्ट्रीय हवाई व अंतराळ संग्रहालय आणि स्टीव्हन एफ. उडवार-हॅझी केंद्र पाहण्याची संधी मिळेल. ऑर्लँडोमध्ये नासाचे केनेडी अंतराळ केंद्र, अंतराळवीर प्रशिक्षण केंद्र आणि एम्ब्री-रिडल वैमानिक विद्यापीठात अवकाश विज्ञानाचे धडे गिरवता येतील. तसेच डॉ. गिरिजा नारळीकर यांच्या सहकार्याने सॅन फ्रान्सिस्को येथील कॅलिफोर्निया विज्ञान अकादमी, स्टॅनफोर्ड विद्यापीठ आणि गुगल मुख्यालयाला विद्यार्थी भेट देतील.

या उपक्रमाबाबत बोलताना जिल्हा परिषद उपाध्यक्ष विवेक वळसे-पाटील म्हणाले की, पूर्वी राज्याबाहेरही न जाऊ शकणारे जिल्हा परिषद शाळांचे विद्यार्थी आज थेट अमेरिकेतील नासाला भेट देत आहेत, ही अत्यंत अभिमानाची बाब आहे. तर अध्यक्ष वीरधवल जगदाळे यांनी, योग्य व्यासपीठ मिळाल्यास ग्रामीण मुले जागतिक स्तरावर चमकतील आणि शहरी-ग्रामीण शैक्षणिक दरी कमी होईल, असा विश्वास व्यक्त केला. ग्रामीण भागातील विद्यार्थ्यांमध्ये प्रचंड गुणवता आणि क्षमता आहे असे म्हटले..मुख्य कार्यकारी अधिकारी गजानन पाटील यांनी गेल्या वर्षीच्या यशामुळे यंदा हा उपक्रम अधिक व्यापक केल्याचे सांगितले. या उपक्रमाला मिळालेल्या प्रतिसादामुळे आणि विद्यार्थ्यांमध्ये निर्माण झालेल्या आत्मविश्वासातून यंदा हा उपक्रम दुसऱ्या वस्तू अधिक व्यापक स्वरूपात राबविण्यात येत आहे. 20 हजार विद्यार्थ्यांमधून आयुक्तांच्या तीन टप्प्यातील निवड प्रक्रियेद्वारे 25 गुणवंत विद्यार्थ्यांची निवड ही मोठी संधी आहे. ग्रामीण भागातील प्रत्येक विद्यार्थ्याला मोठी स्वप्ने पाहण्याचे आणि ती पूर्ण करण्याची संधी मिळावी हा या उपक्रमामागील मुख्य उद्देश आहे.
अमेरिकेसोबतच यंदा 50 विद्यार्थ्यांनी दिल्लीतील राष्ट्रपती भवनाला भेट दिली, तर 50 विद्यार्थ्यांनी जम्मू-काश्मीर, आसाम आणि अरुणाचल प्रदेशात सांस्कृतिक देवाणघेवाण केली. याशिवाय, डिसेंबरमध्ये 27 विद्यार्थ्यांचा एक गट युरोपियन अवकाश संस्थेला भेट देणार आहे. ग्रामीण विद्यार्थ्यांमध्ये वैज्ञानिक दृष्टिकोन, आत्मविश्वास आणि नेतृत्वगुण विकसित करणे हाच या उपक्रमाचा मुख्य हेतू आहे.






