पुणे :पुण्यातील महाराष्ट्र साहित्य परिषदेच्या परिसरात एका कार्यक्रमानंतर शिवसेना (उद्धव बाळासाहेब ठाकरे) गटाच्या पदाधिकारी रेखा कोंडे यांना मारहाण झाल्याचा धक्कादायक प्रकार समोर आला आहे. या घटनेनंतर दोन्ही बाजूंनी एकमेकांवर गंभीर आरोप-प्रत्यारोप करण्यात आले आहे.

या राड्यामागे सोशल मीडियावरील काही पोस्ट, ऑडिओ क्लिप आणि मराठा आंदोलक मनोज जरांगे पाटील यांच्या भूमिकेवरून सुरू असलेला जुना वाद असल्याचे सांगितले जात आहे. या वादाचे रूपांतर थेट हाणामारीत झाले. या घटनेनंतर रेखा कोंडे यांनी आपल्यावर हल्ला झाल्याचे सांगत मनोज जरांगे पाटील, आरती मारणे आणि इतर संबंधित महिलांवर गंभीर आरोप केले आहेत.
रेखा कोंडे यांनी दिलेल्या फिर्यादीवरून पुण्यातील विश्रामबाग पोलीस ठाण्यात एकूण 4 महिलांविरोधात गुन्हा नोंदवण्यात आला आहे. पोलिसांनी दाखल केलेल्या या गुन्ह्यात आरती मारणे-पवार, त्यांची आई, मुलगी आणि पूनम दाभेकर यांचा समावेश आहे. पोलीस या प्रकरणाचा पुढील तपास करत आहेत.

दुसरीकडे, आरती मारणे यांनीही रेखा कोंडे यांचे सर्व आरोप फेटाळून लावत त्यांच्यावर पलटवार केला आहे. रेखा कोंडे यांनीच आपली बदनामी केली असून आपल्याबद्दल आक्षेपार्ह विधाने केल्याचा प्रत्यारोप मारणे यांनी केला आहे. तसेच, याप्रकरणी रेखा कोंडे यांच्यावरच कडक कायदेशीर कारवाई करण्यात यावी, अशी मागणीही आरती मारणे यांनी केली आहे. या परस्परविरोधी तक्रारी आणि आरोपांमुळे पुण्याच्या राजकीय आणि सामाजिक वर्तुळात मोठी खळबळ उडाली आहे.






