पुणे : पिंपरी-चिंचवड महापालिकेच्या यशवंतराव चव्हाण स्मृती (वायसीएम) रुग्णालयातील सेंट्रल मेडिकल स्टोअरमध्ये देण्यात आलेल्या औषधांचा दर्जा खराब असल्याचे समोर आले आहे. यामुळे उपचार घेणाऱ्या रुग्णांच्या जीवाशी खेळ होत असल्याची गंभीर बाब पुढे आली आहे. अन्न व औषध प्रशासनाच्या पाहणीत काही औषधे हलक्या दर्जाची सापडली, तर अनेक औषधे योग्य परवानगीशिवाय तयार केल्याचे स्पष्ट झाले.

या प्रकरणात एफडीएने वायसीएम रुग्णालयातील मेडिकल स्टोअर आणि जेजुरी एमआयडीसीतील औषध कंपनीवर कारवाई केली. या दोन्ही ठिकाणांहून एकूण 1 कोटी 90 लाख 33 हजार 480 रुपये किमतीचा औषधांचा साठा ताब्यात घेण्यात आला आहे. महापालिकेच्या करारानुसार येणाऱ्या औषधांची गुणवत्ता तपासण्यासाठी औषध निरीक्षक एस. एस. बुगाड यांनी सेंट्रल मेडिकल स्टोअरमधून नमुने गोळा केले होते आणि कागदपत्रांची खात्री केली होती.
पुढील वाटप आणि वापर थांबवण्यासाठी औषध निरीक्षक एस. एस. बुगाड यांनी कायद्यानुसार वायसीएम स्टोअरमधील 10 वेगवेगळ्या औषधांचा साठा जप्त केला. या साठ्याची अंदाजे बाजारातील किंमत 1 कोटी 72 लाख 75 हजार 126 रुपये इतकी आहे.

प्रयोगशाळेतील तपासणीत काही औषधे ‘नॉट ऑफ स्टँडर्ड क्वालिटी’ म्हणजेच निकृष्ट दर्जाची ठरली. औषधातील घटकांचे प्रमाण, पाण्यात विरघळण्याचा वेग, गोळ्यांचे किंवा औषधाचे रूप, वजनातील फरक आणि लेबलिंगमध्ये चुका आढळल्या. केअरझिंक, केअरगिल-200, एलडीएलआर-5 आणि डोम्पेरिडोन या औषधांच्या दर्जाबाबतही मोठ्या त्रुटी दिसून आल्या.
तपासात असेही समजले की,जेजुरी एमआयडीसीतील मेसर्स इंडुकेअर फार्मास्युटिकल्स अँड रिसर्च फाउंडेशन या कंपनीकडे काही औषधे बनवण्याची अधिकृत परवानगी नव्हती. त्यामुळे एफडीएने 29 ऑक्टोबर 2026 रोजी या कंपनीला कारणे दाखवा नोटीस पाठवली. काही पाकिटांवर ‘केवळ शासकीय पुरवठ्यासाठी’ असे लिहिले होते, तरीही तयार करताना परवानगी आणि दर्जाचे नियम पाळले गेले नाहीत.त्यामुळे आता वायसीएम रुग्णालयातील औषधांच्या गुणवत्तेवर गंभीर प्रश्नचिन्ह उपस्थित केले जात आहेत.






