दौंड, ता. 21: दौंड शहरात अवैध जुगार आणि मटका व्यवसायाविरोधात दौंड पोलिसांनी धडक कारवाई केली आहे. शहरातील तीन वेगवेगळ्या ठिकाणी छापे टाकून मटका आणि तीन पत्ती जुगार खेळणाऱ्या 12 जणांवर गुन्हे दाखल करण्यात आले आहेत. या कारवाईत रोख रक्कम, मोबाईल, जुगाराच्या चिठ्ठ्या आणि इतर साहित्य असा एकूण 36 हजार 730 रुपयांचा मुद्देमाल जप्त करण्यात आला आहे. याशिवाय दोन वर्षांसाठी हद्दपार केलेल्या एका गुन्हेगाराने प्रतिबंधित क्षेत्रात प्रवेश केल्याचे आढळल्याने त्याच्यावरही स्वतंत्र गुन्हा दाखल करण्यात आला आहे.

पोलिसांनी दिलेल्या माहितीनुसार, गुरुवारी (ता. 20) सायंकाळी साडेचार वाजता हॉटेल आवतच्या भिंतीच्या आडोशाला नवनीत सातव हा कल्याण मटका जुगार खेळविताना आढळला. चौकशीत तो मटक्याचे आकडे हद्दपार आरोपी त्यागी रणदिवे याला देत असल्याचे निष्पन्न झाले. पोलिसांनी दोघांविरुद्ध गुन्हा दाखल करून 2 हजार 465 रुपयांचा मुद्देमाल जप्त केला. त्यानंतर सायंकाळी पाच वाजता रेल्वे ग्राउंडजवळील चंदन लॉजच्या भिंतीच्या आडोशाला छापा टाकण्यात आला. यावेळी अमन जाधव याच्यासह सात जण 52 पत्त्यांच्या कॅटवर तीन पत्ती जुगार खेळताना आढळले. या कारवाईत 18 हजार 60 रुपये रोख आणि पाच हजार रुपये किमतीचा मोबाईल असा एकूण 23 हजार 60 रुपयांचा मुद्देमाल जप्त करण्यात आला.
सायंकाळी साडे सहा वाजता गोवा गल्लीतील पत्राशेडच्या आडोशाला सुरू असलेल्या ऑनलाइन मटका जुगारावर पोलिसांनी छापा टाकला. रोहित गायकवाड हा साथीदारांच्या मदतीने रोख पैसे स्वीकारून मटक्याच्या चिठ्ठ्या देत असल्याचे तसेच व्हॉट्सॲपवरून कल्याण व मुंबई मटक्याचे आकडे स्वीकारत असल्याचे पोलिसांच्या निदर्शनास आले. या कारवाईत तीन जणांविरुद्ध गुन्हा दाखल करून 11 हजार 205 रुपयांचा मुद्देमाल जप्त करण्यात आला.

दरम्यान, सिद्धार्थनगर परिसरात पोलिसांनी हद्दपार आरोपी त्यागी रणदिवे याला ताब्यात रात्री साडेनऊ वाजता घेतले. पुणे जिल्ह्यासह अहिल्यानगर जिल्ह्यातील श्रीगोंदा व कर्जत तालुक्यांतून त्याला दोन वर्षांसाठी हद्दपार करण्यात आले होते. कोणतीही परवानगी न घेता प्रतिबंधित क्षेत्रात प्रवेश केल्याने त्याच्याविरुद्ध महाराष्ट्र पोलीस अधिनियम कलम 142 अन्वये गुन्हा दाखल करण्यात आला.
या सर्व कारवायांमुळे दौंड शहरातील अवैध मटका आणि जुगार व्यवसाय पुन्हा चर्चेत आला आहे. शहरात अशा प्रकारचे अवैध धंदे नेमके कुठे आणि कोणाच्या आशीर्वादाने सुरू आहेत, यावरही प्रश्न उपस्थित होत आहेत. दौंड पोलिसांनी अवैध धंद्यांविरोधातील कारवाई सातत्याने सुरू ठेवण्याची गरज व्यक्त होत आहे.






