यवत, ता. 21 : पतीला पोलिसाची सरकारी नोकरी लागल्यानंतर पत्नीने माहेरून 20 लाख रुपये हुंडा आणावा, यासाठी तिचा मानसिक व शारीरिक छळ केल्याचा धक्कादायक प्रकार समोर आला आहे. तसेच पत्नीला नांदविण्यास नकार देत तिच्या वडिलांना गोळ्या घालून जीवे मारण्याची धमकी दिल्याचा आरोपही करण्यात आला आहे. याप्रकरणी पतीसह सासरच्या सात जणांविरोधात यवत पोलिस ठाण्यात गुन्हा दाखल करण्यात आला आहे.

याप्रकरणी हातवळण (ता. दौंड) येथील 22 वर्षीय विवाहितेने यवत पोलीस ठाण्यात फिर्याद दिली आहे. त्यानुसार विवाहितेचे पती पती अमोल चौगुले, सासरे संभाजी चौगुले, सासू सुनीता चौगुले, दीर अनिकेत चौगुले, संदीप थोरात, नणंद ज्योती साबळे आणि रोशन साबळे (सर्व रा. गाडीलगाव पोस्ट गुणोरे ता. पारनेर जि. अहिल्यानगर) अशा सात जणांविरोधात गुन्हा दाखल करण्यात आला आहे.
पोलिसांनी दिलेल्या माहितीनुसार, फिर्यादी यांचा अमोल चौगुले याच्याशी 4 एप्रिल २०२४ रोजी विवाह झाला होता. लग्नासाठी माहेरच्या कुटुंबाने सुमारे 25 लाख रुपये खर्च केला होता. त्यासाठी वडिलांनी पाच लाख रुपयांचे कर्जही घेतले होते. लग्नानंतर काही दिवसांनी सासरच्या मंडळींकडून किरकोळ कारणांवरून टोमणे मारणे व मानसिक त्रास देणे सुरू झाले.

दरम्यान, 10 ऑक्टोबर 2024 रोजी पती अमोल याला पोलिसाची नोकरी लागल्यानंतर सासू-सासरे व इतर नातेवाइकांनी माहेरून 20लाख रुपये आणण्याची मागणी केल्याचा आरोप आहे. पैसे न दिल्यास पतीला दुसरे लग्न लावून देण्याची धमकीही दिल्याचे फिर्यादीत म्हटले आहे. तसेच पतीचे अन्य महिलांशी संबंध असल्याचा संशय व्यक्त करून जाब विचारला असता पतीने मारहाण केल्याचा आरोपही पत्नीने केला आहे.
पतीने पत्नीला नांदविण्यास नकार देत जीवे मारण्याची धमकी 21 मार्च 2026 रोजी दिली. पत्नीला घेण्यासाठी आलेल्या तिच्या वडिलांना दीर अनिकेत चौगुले आणि त्याचा मित्र संदीप थोरात यांनी गोळ्या घालून ठार मारण्याची धमकी दिल्याचेही फिर्यादीत नमूद आहे. महिला समुपदेशन केंद्रात तक्रार करूनही सासरच्या मंडळींनी नांदविण्यास नकार दिल्यानंतर अखेर आरती यांनी पोलिसांकडे धाव घेतली. याप्रकरणी सात जणांविरोधात गुन्हा दाखल करण्यात आला आहे. पुढील तपास यवत पोलिस करीत आहेत.







