पुणे : राज्य सरकारच्या पुण्यश्लोक अहिल्यादेवी होळकर शेतकरी कर्जमुक्ती योजना 2026 अंतर्गत पुणे जिल्ह्यातील 16,179 शेतकरी एकरकमी समझोता योजनेसाठी पात्र ठरले आहेत. सहकार विभागाने राज्यातील एकूण 1 लाख 69 हजार 820 शेतकऱ्यांची पहिली यादी जाहीर केली आहे. त्यामुळे पात्र शेतकऱ्यांना 2 लाख रुपयांपर्यंतच्या कर्जमाफीचा लाभ मिळण्याची संधी उपलब्ध झाली आहे.

पुणे जिल्ह्यातील पात्र शेतकऱ्यांमध्ये 13,750 जण जिल्हा मध्यवर्ती सहकारी बँकेचे, तर 2,429 जण व्यापारी बँकांचे कर्जदार आहेत. या योजनेत 2 लाख रुपयांपेक्षा जास्त कर्ज थकीत असलेल्या शेतकऱ्यांना कमाल 2 लाख रुपयांपर्यंत सवलत मिळणार आहे. मात्र, त्यापेक्षा अधिक असलेली रक्कम संबंधित शेतकऱ्याला स्वतः भरावी लागणार आहे.
सरकारने 2 जून 2026 रोजी या कर्जमुक्ती योजनेची घोषणा केली होती. यामध्ये कर्जमाफी, एकरकमी समझोता आणि प्रोत्साहन अशा तीन प्रकारांचा समावेश आहे. पहिल्या टप्प्यात आतापर्यंत 25 लाख 81 हजार शेतकऱ्यांच्या याद्या प्रसिद्ध झाल्या आहेत. त्यापैकी आधार प्रमाणीकरण पूर्ण झालेल्या 20 लाख 72 हजार शेतकऱ्यांना 18 हजार कोटी रुपयांची कर्जमाफी देण्यात आली आहे.

ओटीएस योजनेतील पात्र शेतकऱ्यांची यादी संबंधित बँका, विकास संस्था आणि ग्रामपंचायतींमध्ये उपलब्ध करून दिली जाणार आहे. शेतकऱ्यांनी आपले नाव, कर्जखाते आणि थकबाकीची माहिती तपासून घ्यावी. स्वतःच्या हिश्श्याची निश्चित रक्कम 31 मार्च 2027 पर्यंत बँकेत जमा करणे आवश्यक आहे. एकाच बँकेत अनेक कर्जखाती असल्यास कोणत्याही एका खात्यात ही रक्कम भरता येईल.
जिल्हानिहाय आकडेवारीत अहिल्यानगर 26,703 शेतकऱ्यांसह आघाडीवर आहे. अमरावती विभागातील 25,917 शेतकरीही पात्र ठरले आहेत. त्यामुळे पुणे जिल्ह्यातील शेतकऱ्यांनी यादीतील तपशील वेळेत तपासून योजनेचा लाभ घेण्याचे आवाहन करण्यात आले आहे.






