पुणे : मंत्री छगन भुजबळ यांच्या सुरक्षा ताफ्यातील वाहनांचा पुणे जिल्ह्यातील ओतूर परिसरात अपघात झाला आहे. प्रवासादरम्यान ताफ्यातील 4 गाड्या एकमेकांवर आदळल्याने घटनास्थळी काही काळ गोंधळाचे वातावरण निर्माण झाले होते. सुदैवाने या घटनेत कोणीही गंभीर जखमी झालेले नाही आणि छगन भुजबळ पूर्णपणे सुरक्षित आहेत.

मिळालेल्या माहितीनुसार, छगन भुजबळ हे सत्यशोधक समाजाच्या अधिवेशनानिमित्त पुणे जिल्ह्याच्या दौऱ्यावर आले होते. ओतूरमधील एका कार्यक्रमात सहभागी झाल्यानंतर ते पुढील नियोजित कार्यक्रमासाठी रवाना झाले होते. प्रवास सुरू असताना त्यांच्या ताफ्यात अनेक वाहने होती. याच दरम्यान, ताफ्यातील व्हॅनिटी व्हॅनचे नियंत्रण सुटून ती पुढे असलेल्या पोलिसांच्या गाडीवर जाऊन आदळली.
व्हॅनिटी व्हॅनने पोलिसांच्या गाडीला धडक दिल्यानंतर, मागून वेगाने येणारी इतर वाहनेही एकमेकांवर धडकली. अशा प्रकारे एकापाठोपाठ एक एकूण 4 गाड्यांचा विचित्र अपघात झाला. या धडकेमुळे काही वेळासाठी महामार्गावरील वाहतूक आणि ताफ्याची हालचाल पूर्णपणे विस्कळीत झाली होती.

मोठा अनर्थ टळल्याने भुजबळ यांच्या समर्थकांनी आणि कार्यकर्त्यांनी सुटकेचा निश्वास सोडला आहे. अपघातानंतर कोणतीही दुखापत न झाल्याने मंत्री भुजबळ तात्काळ पुढील कार्यक्रमस्थळी रवाना झाले. मात्र, या घटनेमुळे परिसरात मोठी खळबळ उडाली असून, व्हीआयपी दौऱ्यादरम्यान ताफ्यातील वाहनांचा वेग, दोन गाड्यांमधील सुरक्षित अंतर आणि सुरक्षेच्या नियमांबाबत पुन्हा एकदा चर्चा सुरू झाली आहे.







