पुणे : महापालिकेच्या (PMC) भारतरत्न अटलबिहारी वाजपेयी वैद्यकीय महाविद्यालयातील पदभरतीमध्ये मोठा आर्थिक गैरव्यवहार समोर आला आहे. सेवेत कायम करण्याचे आमिष दाखवून 11 कंत्राटी डॉक्टरांकडून प्रत्येकी 10 लाख रुपये उकळण्यात आले असून, याप्रकरणी लाचलुचपत प्रतिबंधक विभागाकडे तक्रार दाखल करण्यात आली आहे. धक्कादायक बाब म्हणजे, या फसवणुकीच्या जाळ्यात महाविद्यालयातीलच तीन डॉक्टरांनी मध्यस्थ म्हणून काम केल्याचा आरोप तक्रारदारांनी केला आहे.

या प्रकरणात डॉ. नानासाहेब भांगरे, डॉ. इरफान मुल्ला आणि डॉ. हेमंत वैद्य यांच्या विरोधात तक्रार करण्यात आली आहे. कंत्राटी डॉक्टरांकडून रोख रक्कम गोळा करून ती पुढे पोहोचवण्याची जबाबदारी या तिघांनी पार पाडल्याचे तक्रारीत म्हटले आहे. त्यामुळे हे तिघेही आता चौकशीच्या फेऱ्यात अडकले आहेत.
महापालिकेने 4 वर्षांपूर्वी सुरू केलेल्या या महाविद्यालयात सुरुवातीला कंत्राटी तत्त्वावर नेमणुका केल्या होत्या. मागील वर्षी येथे MD आणि MS पदवीधारक 28 प्राध्यापकांची कायमस्वरूपी भरती करण्याची प्रक्रिया सुरू झाली. याच संधीचा गैरफायदा घेत कार्यरत कंत्राटी डॉक्टरांकडे पैशांची मागणी करण्यात आली.

मात्र, पैसे देऊन वर्ष उलटले तरी 11 जणांची नियुक्ती झाली नाही. आपली रक्कम परत मागितल्यावर त्यांना उडवाउडवीची उत्तरे मिळू लागली. पीडितांनी सुरुवातीला महाविद्यालयाच्या ट्रस्टचे पदसिद्ध अध्यक्ष असणाऱ्या महापौरांकडे दाद मागितली, परंतु तिथून कोणताही प्रतिसाद न मिळाल्याने अखेर त्यांनी ACB कडे धाव घेतली.
ACB चे अधीक्षक शिरीष सरदेशपांडे यांनी या प्रकरणाची गंभीर दखल घेतली आहे. पुढील 2 ते 3 दिवसांत सर्व तक्रारदारांचे सविस्तर जबाब नोंदवून घेतले जातील. त्यानंतर या संपूर्ण प्रकरणाच्या सखोल तपासासाठी पुणे महापालिका आयुक्तांची रीतसर परवानगी घेण्यात येणार आहे. या गैरव्यवहाराचे मुख्य सूत्रधार कोण आणि गोळा केलेले कोट्यवधी रुपये नेमके कोणाकडे गेले, हे आता पोलीस तपासातूनच स्पष्ट होईल.
—-






