राहुलकुमार अवचट
यवत: अवैध्यरित्या गर्भपात करण्यात आल्याची धक्कादायक घटना उघडकीस आली असून याबाबत २ डॉक्टरांवर यवत पोलिस स्टेशन येथे गुन्हा दाखल करण्यात आला आहे.
गेल्या अनेक दिवसांपासून दौंड तालुक्यातील अवैध्य गर्भलिंग निदान करणारे, विना पदवी डॉक्टर यांच्यावर कारवाई केली होत असताना अवैध्यरित्या गर्भपात केल्याची घटना उघडकीस आली आहे. दौंड तालुक्यातील केडगाव येथील लवंगारे हॉस्पिटल ( लवंगारे मॅटर्निटी अँन्ड इन्फर्टिलीटी हॉस्पिटल) येथे दि. ०६ जुन रोजी दुपारी ०१.४५ च्या सुमारास डॉ. स्वाती लवंगारे या स्त्रीरोगतज्ञ नसताना व गर्भपात करण्याचा अधिकार नसताना त्यांनी गर्भपाताच्या गोळ्यांचा साठा करून अवैधरित्या गर्भपात केला.
यावेळी डॉ. तुकाराम मोटे यांच्या नाव व सहीने गर्भपाताच्या गोळ्या रुग्णांना दिल्या असल्याचे आढळून आले असून याबाबत दौंड उपजिल्हा रुग्णालयाचे डॉ सचिन गुजर यांनी यवत पोलीस स्टेशन येथे फिर्याद दिली. यावरून डॉ. स्वाती लवंगारे ( रा. केडगाव ता. दौंड जि. पुणे ) व डॉ. तुकाराम यशवंत मोटे (रा. ऊरुळी कांचन ता. हवेली जि.पुणे ) यांच्याविरोधात भारतीय न्याय संहिता सह वैद्यकीय गर्भपात कायदा अंतर्गत गुन्हा दाखल करण्यात आला आहे. याबाबत अधिक तपास पोलीस उपनिरीक्षक किशोर वागज हे करत आहेत.
