Tuljapur News : धाराशिव : आई तुळजाभवानी माता साडेतीन पीठापैकी एक पूर्ण शक्तीपीठ असलेल्या महाराष्ट्राची कुलस्वामिनी श्री तुळजाभवानी मातेच्या शारदीय नवरात्र महोत्सवास आई राजा उदो उदो… च्या जयघोषात, मोठ्या उत्साहात घटस्थापना करण्यात आली. या वेळी भाविकांनी हलगीचा कडकडाट आणि संबळाचा निनाद केला. तुळजाभवानी देवीच्या सिंहगाभार्‍यात मंदिर संस्थानचे अध्यक्ष तथा जिल्हाधिकारी डॉ. सचिन ओम्बासे दाम्पत्याच्या हस्ते दुपारी १२ वाजण्याच्या सुमारास पारंपारिक पद्धतीने घटस्थापना करण्यात आली. या वेळी सदानंदाचा उदे उदे… असा गजर करीत हजारो भाविकांनी या सोहळ्याचे दर्शन घेतले.
हजारो भाविकांनी घेतले दर्शन
रविवारी पहाटे दीड वाजण्याच्या सुमारास श्री तुळजाभवानीची घोरनिद्रा संपुष्टात आल्यानंतर भोपी पुजाऱ्यांनी देवी मूर्तीची सिंहासनावर पूर्ववत प्रतिष्ठापणा केली. यानंतर पारंपारिक धार्मिक विधी होऊन विशेष पंचामृत अभिषेक पूजा करून भाविकांना देवी दर्शनास सोडण्यात आले. (Tuljapur News) सकाळी सहा वाजता देवीची अभिषेक घाट होऊन नित्योपचार पंचामृत अभिषेक पार पडले. महंत व भोपे पुजारी यांनी देवीस नैवेद्य दाखवून धुपारती करून अंगारा हे विधी पार पडले. देवीच्या चांदी सिंहासनाला झळाळी दिल्यामुळे ते अधिक खुलून दिसत होते. अभिषेकानंतर सर्वसामान्य भाविकांना तुळजाभवानी देवीचे दर्शन खुले करण्यात आले. सकाळी ६ वाजण्याच्या सुमारास पुन्हा अभिषेक घाट नित्योपचार पंचामृत अभिषेक करण्यात आले.
या वेळी तुळजाभवानीची विशेष अलंकार पूजा बांधली होती. दुपारी बारा वाजता संस्थानचे अध्यक्ष जिल्हाधिकारी डॉ. सचिन ओम्बासे यांनी तुळजाभवानीची शासकीय आरती करून गोमुख तीर्थाजवळील घटकलशाची विधिवत पूजा केली व हे घटकलश सवाद्य मंदिरात आणण्यात आले. (Tuljapur News) सिंह गाभाऱ्यात घटकलश वावरीत ठेवून पारंपारिक पद्धतीने त्याचे पूजन करून घटस्थापना करण्यात आली. पुढील आठ दिवस चालणाऱ्या विविध धार्मिक विधीसाठी यावेळी ब्रह्मवृंदास ओम्बासे दांम्पत्याच्या हस्ते वर्णी देण्यात आली. यानंतर मंदिरातील उपदेवतांच्या ठिकाणीही घटस्थापना करण्यात आली.
तुळजाभवानी देवीच्या मंदिरात नवरात्रौत्सव कालावधीत विविध धार्मिक विधी केले जातात. त्यासाठी उपस्थित ब्रम्हवृंदांना जिल्हाधिकारी डॉ. सचिन ओम्बासे दाम्पत्याच्या हस्ते वर्णी देण्यात आली. (Tuljapur News) मंदिरातील उपदेवता असलेल्या खंडोबा मंदिर, यमाई देवी मंदिर, टोळभैरव आणि आदीमाया आदिशक्ती या मंदिरामध्येही जिल्हाधिकारी डॉ. ओम्बासे यांच्या हस्ते घटस्थापना करण्यात आली. या वेळी मंदिर समितीचे विश्वस्त तथा आमदार राणाजगजितसिंह पाटील, अर्चना पाटील, जिल्हा पोलीस अधीक्षक अतुल कुलकर्णी, विश्वस्त उपविभागीय अधिकारी डॉ. योगेश खरमाटे, महंत तुकोजीबुवा, महंत वाकोजीबुवा, महंत चिलोजीबुवा यांच्यासह तिन्ही पुजारी मंडळांचे पदाधिकारी, भाविक मोठ्या संख्येने उपस्थित होते.
अधिक बातम्या वाचण्यासाठी येथे क्लिक करा :
Kolhapur News : छत्रपती शिवरायांनी तुळजाभवानीला दिलेले दागिने गहाळ; संभाजीराजेंचा आंदोलनाचा इशारा!
