पुणे : पुण्यातून एक अत्यंत धक्कादायक आणि संतापजनक प्रकार समोर आला आहे. स्पर्धा परीक्षेचा अभ्यास करताना जुळलेले प्रेमसंबंध आणि त्यानंतर झालेला विवाह काही कालावधीतच हुंड्याच्या मागणीमुळे उद्ध्वस्त झाल्याची घटना घडली आहे. प्रशिक्षणार्थी पोलीस उपनिरीक्षकानेचआपल्या पत्नीचा शारीरिक आणि मानसिक छळ केल्याप्रकरणी सहकारनगर पोलीस ठाण्यात गुन्हा दाखल करण्यात आला आहे.
मिळालेल्या माहितीनुसार, धनकवडी परिसरात राहणाऱ्या 31 वर्षीय पीडित महिलेची आणि राहुल शेषेराव राठोड (वय 29,रा. बीड) यांची 2022 मध्ये स्पर्धा परीक्षेची तयारी करत असताना ओळख झाली होती. पुढे या ओळखीचे रूपांतर प्रेमात झाले आणि दोघांनी लग्न केले. मात्र लग्नानंतर काही दिवसांतच राहुल याचा खरा चेहरा समोर आला.
हुंड्यापोटी त्याने पत्नीकडे तब्बल 40 लाख रुपये रोख, एक फ्लॅट आणि महागड्या कारची मागणी करण्यास सुरुवात केली. ही मागणी पूर्ण न झाल्याने त्याने पत्नीवर अमानुष अत्याचार केले. इतकेच नव्हे तर, खाकी वर्दीचा आणि आपल्या सर्व्हिस पिस्तूलचा धाक दाखवून तिला जीवे मारण्याची धमकीही दिली.
या सततच्या छळामुळे आणि जीवितास निर्माण झालेल्या धोक्यामुळे ती महिला प्रचंड खचली होती. अखेर सर्व सहनशक्ती संपल्यानंतर तिने धीर करून सहकारनगर पोलीस ठाण्यात धाव घेतली आणि पती राहुल राठोड तसेच राजू पवार (वय 40, रा. बीड) यांच्याविरोधात फिर्याद दिली. पोलिसांनी या प्रकरणी गंभीर गुन्हे दाखल केले असून, पोलीस उपनिरीक्षकासारख्या जबाबदार पदावर असलेल्या व्यक्तीकडून अशा प्रकारे हुंड्यासाठी छळ झाल्यामुळे सर्वत्र संताप व्यक्त होत आहे. पोलीस या प्रकरणाचा सखोल तपास करत आहेत.
