पुणे: मुलांच्या सुरक्षिततेसाठी आई कोणत्याही संकटाचा सामना करते, अशी सर्वसाधारणपणे भावना असते. मात्र, पुण्यात समोर आलेल्या एका गंभीर प्रकरणामुळे आई-मुलीच्या नात्याला धक्का बसला आहे. स्वतःच्या अल्पवयीन मुलीला वेश्याव्यवसायासाठी प्रवृत्त केल्याचा आरोप एका महिलेवर करण्यात आला आहे. ग्राहकांकडून पैसे घेऊन त्यांना मुलीकडे पाठवले जात असल्याची माहिती पोलिसांना मिळाली होती. त्यानंतर पोलिसांनी कारवाई करत मुलीची सुटका केली असून, तिच्या आईला अटक केली आहे.
ही घटना पुण्यातील सहकारनगर परिसरात उघडकीस आली. शकुंतला अपार्टमेंटमधील एका सदनिकेत हा प्रकार सुरू असल्याची गोपनीय माहिती पोलिसांच्या अनैतिक मानवी वाहतूक व व्यापार प्रतिबंध कक्षाला (AHTU) मिळाली होती.
बनावट ग्राहकाच्या मदतीने पोलिसांची कारवाई
12 ऑक्टोबर रोजी सहकारनगरमधील शकुंतला अपार्टमेंटच्या ‘बी’ इमारतीतील एका फ्लॅटमध्ये अल्पवयीन मुलीकडून वेश्याव्यवसाय करून घेतला जात असल्याची माहिती पोलिसांपर्यंत पोहोचली. या माहितीची सत्यता तपासण्यासाठी पोलिसांनी नियोजनबद्ध पद्धतीने सापळा रचला. त्यासाठी प्रथम एका बनावट ग्राहकाला संबंधित ठिकाणी पाठवण्यात आले.
प्राथमिक पडताळणीनंतर पोलिसांच्या पथकाने सदनिकेवर अचानक छापा टाकला. या कारवाईदरम्यान अल्पवयीन मुलीची सुटका करण्यात आली. तिच्याच आईने तिला या व्यवसायात ढकलल्याचा आरोप असून, पोलिसांनी महिलेला ताब्यात घेऊन अटक केली आहे.
पोलीस निरीक्षक आशालता खापरे यांच्या सूचनेनुसार पोलीस अंमलदार ईश्वर आंधळे, बबनराव केदार, अमेय रसाळ, अविनाश कोंडे आणि वैशाली खेडेकर यांच्या पथकाने ही कारवाई केली. दरम्यान, याप्रकरणी अधिक तपास सुरु आहे.
