पालघर : पालघर जिल्ह्यातील केळवे रोड परिसरात पुराच्या पाण्यामुळे अंगावर शहारे आणणारी घटना घडली आहे. मुसळधार पावसामुळे घरात पुराचे पाणी शिरल्यानंतर एका कुटुंबाला आपल्या मृत नातेवाईकाचा मृतदेह घेऊन तब्बल चार तास घराच्या छतावर आसरा घ्यावा लागला. या हृदयद्रावक घटनेने संपूर्ण परिसर हळहळ व्यक्त करत आहे.
मिळालेल्या माहितीनुसार, पालघरमध्ये गेल्या चार दिवसांपासून सुरू असलेल्या मुसळधार पावसामुळे अनेक भाग जलमय झाले आहेत. नदी-नाले दुथडी भरून वाहत असून अनेक गावांचा संपर्क तुटला आहे. अशाच परिस्थितीत केळवे रोड येथे राहणाऱ्या लिलका कुटुंबावर दु:खाचा डोंगर कोसळला. कुटुंबातील ५५ वर्षीय अनुसया मनोहर लिलका यांच्यावर धुंदलवाडी येथील रुग्णालयात उपचार सुरू होते. मात्र रविवारी रात्री उपचारादरम्यान त्यांचे निधन झाले.
सोमवारी पहाटे रुग्णवाहिकेतून त्यांचे पार्थिव घरी आणण्यात आले. मात्र रेल्वे अंडरपासमध्ये मोठ्या प्रमाणात पाणी साचल्याने मृतदेह खांद्यावरून घरापर्यंत आणावा लागला. दरम्यान, सकाळी पावसाचा जोर आणखी वाढला आणि काही वेळातच पुराचे पाणी घरात घुसले. पाण्याचा वेग इतका वाढला की मृतदेह वाहून जाण्याची भीती निर्माण झाली.
अचानक निर्माण झालेल्या या संकटात कुटुंबीयांसमोर मोठा पेच निर्माण झाला. अखेर त्यांनी घराच्या स्वयंपाकघरातील छताचे दोन सिमेंटचे पत्रे फोडून मोठ्या कष्टाने अनुसया लिलका यांचे पार्थिव छतावर नेले. त्यानंतर प्लास्टिकने मृतदेह झाकून कुटुंबातील सदस्यही छतावरच थांबले.
पुराच्या पाण्याने घराला पूर्ण वेढा दिल्यामुळे कुटुंबीयांना तब्बल चार तास छतावरच मृतदेहासोबत मदतीची वाट पाहावी लागली. अखेर घटनेची माहिती मिळताच पोलीस आणि प्रशासनाचे पथक घटनास्थळी पोहोचले आणि कुटुंबीयांची सुरक्षित सुटका करून पुढील कार्यवाही केली.
या घटनेने मुसळधार पावसामुळे निर्माण झालेल्या परिस्थितीची भीषणता पुन्हा एकदा समोर आली असून, स्थानिक नागरिकांमध्ये भीतीचे वातावरण निर्माण झाले आहे.
