कोल्हापूर : छत्रपती शिवाजी महाराज, छत्रपती संभाजी महाराज यांचा अवमान करणारा तसेच इतिहास संशोधक इंद्रजीत सावंत यांना धमकी देणारा प्रशांत कोरटकर आज अखेर तुरुंगाबाहेर आला आहे. पोलीस संरक्षणात कोरटकरला बाहेर काढण्यात आल आहे. दोन दिवसांपूर्वी त्याला कोल्हापूर सत्र न्यायालयाने जामीन मंजूर केला होता. आज अखेर कोरटकर कळंबा तुरुंगाबाहेर आला आहे.
इतिहास अभ्यासक इंद्रजीत सावंत यांना फोन करून प्रशांत कोरटकरने धमकी दिली होती.त्यावेळी त्यांने छत्रपती शिवाजी महाराज आणि छत्रपती संभाजी महाराज यांच्याबद्दल आक्षेपार्ह शब्द देखील वापरले होते याच प्रकरणात प्रशांत कोरटकरवर कोल्हापुरात गुन्हा देखील दाखल करण्यात आला होता. याप्रकरणी त्याला सुरुवातीला पाच दिवस पोलीस कोठडी आणि त्यानंतर बारा दिवसाची न्यायालयीन कोठडी सुनावण्यात आली होती.त्यानंतर कोरटकरने जामिन मिळवण्यासाठी कोर्टात याचिका दाखल केली होती. त्यावर कोर्टाने अखेर काही अटी-शर्तीसह जामिन मंजूर केला आहे.
दरम्यान वकील असीम सरोदे याबाबत म्हणाले, प्रशांत कोरटकरला जामिन मंजूर व्हावा अशाच प्रकारची कलमे लावण्यात आली होती. गुन्हा नोंदवताना तीन वर्षांपेक्षा जास्त शिक्षा नसलेली कलमे असल्यामुळे साधारणतः अशा प्रकरणात जामिन होत असतो. जामिन देताना कोणती कारणे लक्षात घेतली आहेत ते पाहणे महत्वाचे ठरेल. प्रशांत कोरटकरला जामिन देताना दिलेल्या नियमांचे पालन न् केल्यास आम्ही त्याचा जामिन रद्द करण्यासाठी प्रक्रिया सुरू करू असेही त्यांनी म्हटले आहे.
