जळगाव : जळगावातून अंगाचा थरकाप उडवणारी घटना समोर येत आहे. एक महिला रस्ता ओलांडत असताना भरधाव आलेल्या कारने तिला जोराची धडक दिल्याची घटना घडली आहे. ही धडक एवढी भयंकर होती की, महिला फुटबॉलसारखी हवेत उडून खाली पडली आहे. या अपघातात महिला गंभीर जखमी झाली आहे. सुमनबाई भिका राजपूत असं अपघातात गंभीर जखमी झालेल्या महिलेचं नाव आहे.
महिलेला धडक दिल्यानंतर कार भरधाव वेगात पुढे निघून गेली अन् पलटी झाली. ही घटना जळगाव तालुक्यात रविवार 11 ऑगस्ट रोजी संध्याकाळी साडे सात वाजण्याच्या सुमारास घडली आहे. अंगावर काटा आणणाऱ्या या घटनेचा व्हिडीओ सध्या तुफान व्हायरल होत आहे. या व्हिडीओतून धक्कादायक वास्तव समोर आलं आहे. एका भरधाव कारने दुचाकीस्वार आणि पायी जाणाऱ्या महिलेला जबर धडक दिली. त्यानंतर कार भरधाव वेगात पुढे जाऊन पलटी झाल्यानंतर कारमधील तिघेजण गंभीर जखमी झाले.
नेमकं काय घडलं?
वावडदाच्या दिशेने कार भरधाव वेगात येत होती. वावडदा चौफुलीवर सुमनबाई राजपूत ही महिला डोक्यावर भांडे घेऊन रस्ता ओलांडत होत्या. एक दोन-जण रस्त्यावरून ये जा करत होते. तेवढ्यात एक दुचाकी आली. ही महिला रस्ता ओलांडत असताना भरधाव वेगाने एक कार समोरून आली. आणि रस्त्याच्या कडेला असलेल्या सुमनबाईंना जोरदार धडक दिली. ही धडक इतकी भीषण होती की, सुमनबाई फुटबॉलसारख्या हवेत उडाल्या आणि खाली पडल्या. या अपघातात सुमनबाई गंभीर जखमी झाल्या असून त्यांच्यावर रुग्णालयात उपचार सुरू आहेत .
दरम्यान, भरधाव कारने एका दुचाकी स्वाराला देखील धडक दिली अन् पुढे जाऊन उलटली. यामध्ये कारमधील तिघे आणि इतर दोघे असे पाचजण जखमी झाले आहेत. या सर्वांवर जळगावच्या रुग्णालयात उपचार सुरू आहेत. या प्रकरणी पोलिसांनी गुन्हा दाखल केला असून अधिक तपास करत आहेत.
जळगावात भयंकर हिट अँड रन, महिला फुटबॉलसारखी उडाली; थरकाप उडवणारा Video #Jalgaonhitandrun pic.twitter.com/0rVidqkUOq
— Yogesh Kangude (@Yogesh_Kangude) August 13, 2024
