नाशिक : महिलांवर लैंगिक अत्याचार आणि आर्थिक फसवणुकीचे गंभीर आरोप असलेला भोंदूबाबा अशोक खरात याच्या जामीन अर्जावर आज नाशिक जिल्हा व सत्र न्यायालयात सुनावणी झाली नाही. विशेष सरकारी वकील अॅड. उज्ज्वल निकम आणि अॅड. अजय मिसर न्यायालयात उपस्थित होते. मात्र, अशोक खरातचे वकील अॅड. राहुल कासलीवाल वेळेवर न्यायालयात उपस्थित न राहिल्याने सुनावणी पुढे ढकलण्यात आली. आता या जामीन अर्जावर १६ सप्टेंबर रोजी सुनावणी होणार आहे.
दुपारी साडेबारा वाजण्याच्या सुमारास अॅड. उज्ज्वल निकम आणि अॅड. अजय मिसर न्यायालयात दाखल झाले. त्यानंतर आरोपीच्या वकिलांचा पुकारा करण्यात आला. मात्र, राहुल कासलीवाल उपस्थित नसल्याने त्यांच्या सहकाऱ्यांनी न्यायालयाकडे अर्ध्या तासाची मुदत मागितली. त्यानंतर न्यायालयाने जामीन अर्जावरील सुनावणी पुढे ढकलण्याचा निर्णय घेतला.
सुनावणीनंतर अॅड. उज्ज्वल निकम यांनी सरकारची भूमिका स्पष्ट केली. त्यांच्या म्हणण्यानुसार, अशोक खरातविरोधात महाराष्ट्र शासनाच्या एसआयटीने लैंगिक अत्याचाराचे आठ स्वतंत्र गुन्हे दाखल केले आहेत. त्यापैकी सहा गुन्हे सत्र न्यायालयात वर्ग झाले असून, दोन प्रकरणे अद्याप मॅजिस्ट्रेट न्यायालयात आहेत.
सत्र न्यायालयात वर्ग झालेल्या प्रकरणांपैकी एका प्रकरणात अशोक खरातने जामीन देण्याची मागणी केली आहे. मात्र, सरकारने त्याच्या जामीन अर्जाला विरोध केला आहे. विविध पीडित महिलांवर कथितरीत्या लैंगिक अत्याचार करताना त्यांच्या मनात भीती निर्माण केल्याबाबतचे पुरावे सरकारच्या वतीने न्यायालयात सादर करण्यात आल्याचे निकम यांनी सांगितले.
१६ सप्टेंबर रोजी दोन्ही बाजूंचा युक्तिवाद ऐकल्यानंतर न्यायालय या जामीन अर्जावर निर्णय घेणार आहे. दरम्यान, अशोक खरातविरोधात नाशिक शहर, नाशिक ग्रामीण आणि अहिल्यानगर जिल्ह्यात मिळून १७ गुन्हे दाखल असल्याची माहिती समोर आली आहे. यापैकी १२ महत्त्वाच्या गुन्ह्यांचा तपास विशेष तपास पथकाकडून सुरू आहे. त्यामुळे १६ सप्टेंबरच्या सुनावणीकडे आता लक्ष लागले आहे.
