‘आजपासून आपण दोस्त’ म्हणत शेकहॅण्ड करायला जवळ आला अन् कमरेला लावलेलं पिस्तूल काढत पोटावर दोन राउंड फायर; १४ जणांवर गुन्हा दाखल

नाशिक : नाशिकमधील गोसावीवाडी परिसरात जुन्या वादातून एका तरुणाची गोळ्या झाडून हत्या करण्यात आल्याने खळबळ उडाली आहे. सुमित अरुण पगारे असे मृत तरुणाचे नाव असून, रविवारी सायंकाळी ही घटना घडली. या प्रकरणी नाशिकरोड पोलीस ठाण्यात 14 जणांविरोधात गुन्हा दाखल करण्यात आला असून, पोलिसांनी अवघ्या 24 तासांत 12 संशयितांना अटक केली आहे. मुख्य गोळीबार करणाऱ्या संशयितासह आणखी एका आरोपीचा शोध सुरू आहे.

पानमसाला घेत असताना झाला हल्ला

या प्रकरणी सुमित भाटिया यांनी नाशिकरोड पोलीस ठाण्यात फिर्याद दिली आहे. फिर्यादीनुसार, रविवारी सायंकाळी सातच्या सुमारास सुमित पगारे, सुमित भाटिया आणि आकाश बोर्डे हे तिघे गोसावीवाडीतील टिळे हॉस्पिटलसमोरील गंगोत्री जनता स्टोअर येथे पानमसाला खरेदी करण्यासाठी गेले होते.

याच वेळी 14 जणांचा एक गट तेथे आला. त्यांनी जुन्या वादाचा मुद्दा उपस्थित करत तिघांसोबत वाद घालण्यास सुरुवात केली. सुरुवातीला शाब्दिक बाचाबाची झाली. मात्र, काही क्षणांतच या वादाचे रूप हिंसक हल्ल्यात बदलले.

हस्तांदोलनाच्या बहाण्याने झाडल्या गोळ्या

फिर्यादीत नमूद केल्यानुसार, राजिक शेख याने सुमित पगारेला ‘आपल्यातील वाद कायमचा मिटवू’ असे सांगत हस्तांदोलन करण्याचा प्रयत्न केला. मात्र, हा केवळ बहाणा असल्याचे पोलिसांच्या तपासात समोर आले आहे.

 

हात मिळवत असताना राजिक शेख याने कमरेला लावलेले पिस्तूल बाहेर काढले आणि सुमित पगारेच्या पोटावर सलग दोन गोळ्या झाडल्या. अचानक झालेल्या या गोळीबारामुळे परिसरात एकच गोंधळ उडाला. गंभीर जखमी झालेल्या सुमित पगारेला तातडीने रुग्णालयात दाखल करण्यात आले. मात्र, उपचारादरम्यान त्याचा मृत्यू झाला.

पूर्ववैमनस्य आणि वर्चस्वाच्या वादातून हत्या

घटनेची माहिती मिळताच पोलीस उपायुक्त किशोर काळे, सहाय्यक पोलीस आयुक्त अद्विता शिंदे आणि नाशिकरोड पोलीस ठाण्याचे वरिष्ठ पोलीस निरीक्षक जितेंद्र सपकाळे यांच्यासह गुन्हे शोध पथक घटनास्थळी दाखल झाले.

हत्येनंतर पोलिसांनी तातडीने तपास सुरू केला. गोसावीवाडी परिसरात दिवसभर मोठा पोलीस बंदोबस्त तैनात करण्यात आला होता. प्राथमिक तपासात पूर्ववैमनस्य आणि वर्चस्वाच्या वादातून ही हत्या झाल्याचा संशय पोलिसांनी व्यक्त केला आहे.

12 संशयितांना अटक, दोघांचा शोध सुरू

या प्रकरणी नाशिकरोड पोलीस ठाण्यात 14 संशयितांविरोधात हत्येचा गुन्हा दाखल करण्यात आला आहे. पोलिसांनी अवघ्या 24 तासांत 12 संशयितांना अटक केली आहे. मुख्य गोळीबार करणारा संशयित आणि आणखी एका आरोपीचा पोलिसांकडून शोध सुरू आहे.