छत्रपती संभाजीनगर :छत्रपती संभाजीनगरमध्ये सासरच्या जाचाला कंटाळून एका तरुणीने स्वतःचे जीवन संपवल्याची धक्कादायक घटना समोर आली आहे. तबस्सुम साबेर शेख असे मृत विवाहितेचे नाव असून, या प्रकरणी वाळूज एमआयडीसी पोलीस ठाण्यात पतीसह सासू आणि सासऱ्यांविरुद्ध गंभीर गुन्ह्यांची नोंद करण्यात आली आहे.
मृत तबस्सुम यांचा भाऊ तालेब मकबुल अन्सारी यांनी या प्रकरणी पोलिसांत तक्रार दाखल केली. मिळालेल्या माहितीनुसार, तबस्सुम यांचा विवाह गंगापूर तालुक्यातील जोगेश्वरी येथील रहिवासी साबेर शेख याच्यासोबत झाला होता. लग्नानंतर काही दिवस सर्वकाही व्यवस्थित सुरू होते. मात्र, 15 डिसेंबर 2016 ते 12 ऑगस्ट 2026 या काळात सासरच्या मंडळींनी त्यांचा छळ सुरू केला.
पती साबेर जुबेर शेख, सासरे जुबेर शेख आणि सासू हरजाना जुबेर शेख यांनी वारंवार माहेरून पैसे आणण्यासाठी तबस्सुम यांच्यावर दबाव टाकला. मागणी पूर्ण न झाल्याने त्यांना सातत्याने शिवीगाळ व मारहाण केली जात होती. एवढेच नव्हे तर, त्यांना अन्नाविना उपाशी ठेवून अत्यंत क्रूरपणे शारीरिक आणि मानसिक त्रास दिला गेला. सासरच्या या असह्य छळाला व जाचाला कंटाळून अखेर तबस्सुम यांनी टोकाचे पाऊल उचलले.
या घटनेप्रकरणी 17 ऑगस्ट 2026 रोजी रात्री 9.10 वाजता वाळूज एमआयडीसी पोलिसांनी गुन्हा नोंदवला आहे (गुन्हा क्रमांक 798/2026). पोलिसांनी आरोपींविरुद्ध भारतीय न्याय संहितेच्या (BNS) कलम 108, 85, 115(2), 3(5) सह हुंडाबंदी कायद्याच्या कलम 3 आणि 4 अंतर्गत गुन्हा दाखल केला आहे. या दुर्दैवी प्रकरणाचा अधिक तपास पोलीस उपनिरीक्षक सांगळे करत आहेत.
