पुणे : राज्यातील भरती परीक्षा अधिक सुरक्षित, पारदर्शक आणि विश्वासार्ह करण्यासाठी महाराष्ट्र शासनाने स्थापन केलेल्या उच्चस्तरीय टास्क फोर्सकडून विविध घटकांकडून सूचना मागविण्यात येत आहेत. याच पार्श्वभूमीवर पुणे विभागातील विद्यार्थी, स्पर्धा परीक्षा उमेदवार, शैक्षणिक संस्था, परीक्षा यंत्रणा आणि विषयतज्ज्ञांशी थेट संवाद साधण्यासाठी १२ सप्टेंबर रोजी पुण्यात सल्लामसलत आयोजित करण्यात आली आहे.
पुणे हे स्पर्धा परीक्षांच्या तयारीचे प्रमुख केंद्र असल्याने या चर्चेला विशेष महत्त्व आहे. सावित्रीबाई फुले पुणे विद्यापीठात १२ सप्टेंबर २०२६ रोजी सकाळी १०.३० ते सायंकाळी ५.३० या वेळेत हा संवाद होणार आहे. पुणे जिल्ह्यासह पुणे महसूल विभागातील संबंधित घटकांना या प्रक्रियेत सहभागी होता येणार आहे.
भरती परीक्षेच्या विविध टप्प्यांमध्ये उमेदवारांना येणाऱ्या अडचणी, त्यांचे अनुभव, अपेक्षा आणि परीक्षा पद्धतीत आवश्यक असलेल्या सुधारणा याबाबत या बैठकीत चर्चा केली जाणार आहे. प्रश्नपत्रिका आणि परीक्षा केंद्र व्यवस्थापन, परीक्षेची सुरक्षितता, तंत्रज्ञानाचा वापर, उमेदवारांशी संवाद, तक्रार निवारण व्यवस्था तसेच परीक्षा प्रक्रियेतील इतर बाबींवर सहभागी व्यक्तींना आपले मत आणि सूचना मांडता येतील.
सल्लामसलत प्रक्रियेसाठी पुणे जिल्हाधिकारी कार्यालयाच्या पाचव्या मजल्यावर स्वतंत्र समन्वय कक्ष सुरू करण्यात आला आहे. विद्यार्थी, स्पर्धा परीक्षा उमेदवार, शैक्षणिक संस्था आणि विषयतज्ज्ञांना आपल्या सूचना प्रशासनापर्यंत पोहोचविण्याची संधी या माध्यमातून उपलब्ध झाली आहे.
इच्छुकांनी आपल्या सूचना आणि अभिप्राय गुरुवार, १० सप्टेंबर २०२६ पर्यंत `Pune-ExamReformsTaskforce@maharashtra.gov.in` या ई-मेलवर पाठवावेत, असे आवाहन जिल्हा प्रशासनाने केले आहे. प्राप्त सूचना आणि चर्चेसाठी आलेल्या विनंत्यांचा आढावा घेऊन ११ सप्टेंबर रोजी संबंधित व्यक्ती आणि संस्थांना चर्चेची वेळ कळविण्यात येणार आहे. या सल्लामसलतीतून राज्यातील भरती परीक्षा अधिक पारदर्शक आणि उमेदवाराभिमुख करण्यासाठी ठोस उपाययोजना सुचण्याची अपेक्षा आहे.
