नाशिक: नाशिक शहरामध्ये शनिवारी मोठी दुर्घटना घडली आहे. गंगापूर रोडवरील शांतिनिकेतन चौक भागात ऑक्सिजन सिलेंडरची वाहतूक करणाऱ्या टेम्पोमधील तीन सिलेंडरचा स्फोट झाला आहे. यामुळे टेम्पोतील अन्य सिलिंडर हवेत उडाल्याने भीतीचे वातावरण या परिसरात निर्माण झाले होते.
नाशिक शहरामधील गंगापूर भाग हा अतिशय उच्चभ्रू भाग आहे. या स्फोटामुळे ऋषिराज होरायझन, शैलजा अपार्टमेंट, पंचमी अपार्टमेंट या इमारतीमधील घराच्या बालकनीच्या काचा फुटल्या आहेत. केंद्रीय मंत्री भारती पवार यांच्या निवासस्थानापासून हाकेच्या अंतरावर घटना घडली आहे.
स्फोट झाल्यानंतर सिलेंडरचा पत्रा उडून रिक्षावर आदळला. यामध्ये प्रवासी आणि रिक्षाचालक थोडक्यात बचावले आहेत. दोन कारचे देखील नुकसान झाले आहे. तसेच माजी नगरसेवक शरद पोशिरे यांच्या घराचे नुकसान झाले आहे. या घटनेत ६ ते १० जण जखमी झाल्याचे सांगण्यात येत आहे. या भीषण स्फोटात कोणत्याही प्रकारची जीवितहानी झालेली नाही.
