नाशिक: आरक्षणाच्या मागणीसाठी मराठा समाजाच्या वतीने नाशिक शहरातील छत्रपती शिवाजी स्मारकाजवळ गेल्या ४८ दिवसांपासून साखळी उपोषण सुरू आहे. आज या आंदोलकांना भेटण्यासाठी गेलेल्या शिवसेना खासदार हेमंत गेाडसे यांना आंदोलकांनी जाब चांगलाच विचारला. तसेच समाजासाठी राजीनामा द्या, अशी मागणी केली. त्यानंतर हेमंत गोडसे यांनी राजीनामा दिला असून तो मुख्यमंत्री एकनाथ शिंदे यांना पाठवला आहे.
जालन्यातील आंतरवली सराटीमध्ये मनोज जरांगे पाटील यांनी आंदोलन सुरू केल्यानंतर नाशिकमध्ये आंदोलन सुरू करण्यात आले आहे. गेल्या दोन दिवसांपासून आंदोलकांपैकी नाना बच्छाव यांनी आमरण उपोषण सुरू केले आहे. दिवसेंदिवस नाशिक जिल्ह्यामध्ये आंदोलन तीव्र होत आहे. दीडशेहुन अधिक गावांमध्ये राजकीय नेते आणि मंत्र्यांना गावबंदी करण्यात आली आहे. उलट मराठा समाजाच्या आक्रमक भूमिकेमुळे अनेक मंत्र्यांचे दौरे आणि कार्यक्रम देखील रद्द होत आहेत.
दरम्यान, सोमवारी आंदोलनाच्या ठिकाणी शिवसेनेचे खासदार हेमंत गोडसे हे आंदोलकांना भेटण्यासाठी गेल्यानंतर कार्यकर्त्यांनी संताप व्यक्त केला. मराठा समाजासाठी तुम्ही खासदारकीचा राजीनामा द्या, तुम्हाला आम्ही पुन्हा निवडून आणू, असे यावेळी सांगण्यात आले. यानंतर खासदार हेमंत गोडसे यांनी पक्षाचे मुख्य नेते आणि मुख्यमंत्री एकनाथ शिंदे यांच्याकडे राजीनामा दिला आहे. तसेच मराठा समाजाला आरक्षण देण्यासाठी ठोस पाऊले उचलावीत, अशी मागणी केली आहे.
