बीड : मराठा आरक्षणासाठी मनोज जरांगे यांनी उपोषण सुरू केले असताना दुसरीकडे राज्यात काही ठिकाणी जाळपोळीच्या घटना घडत आहेत. बीड जिल्ह्यामध्ये राष्ट्रवादी काँग्रेस अजित पवार गटाचे आमदार प्रकाश सोळंके यांच्या बंगल्यावर दगडफेक आणि आवारातील वाहनांना आग लावण्याची घटना घडली. त्यानंतर आता बीडमधील राष्ट्रवादी काँग्रेस पक्षाचे कार्यालय ‘राष्ट्रवादी भवन’ पेटवून दिल्याची घटना समोर आली आहे. तसेच मराठा आंदोलकांनी राजकीय पक्षांशी संबंधित हॉटेल, संस्थांच्या कार्यालयांची जाळपोळ केल्याचा घटना देखील घडल्या आहेत.
बीडमध्ये संतप्त जमावाने राष्ट्रवादी काँग्रेसचे आमदार संदीप क्षीरसागर आणि ओबीसीचे ज्येष्ठ नेते जयदत्त क्षीरसागर हे राहत असलेल्या बंगल्याला आग लावली आहे. बीड जिल्ह्यात सुरू असलेल्या ‘या’ जाळपोळीच्या घटनांमुळे तणावाचे वातावरण निर्माण झाले आहे. त्याआधी मराठा आंदोलकांच्या जमावाने क्षीरसागर कुटुंबीयांच्या ताब्यात असलेल्या केएसके कॉलेजच्या संस्था कार्यालयाला देखील आग लावली.
दरम्यान धुळे-सोलापूर हायवेवर बीड शहरानजीक असलेल्या ‘हॉटेल सनराइज’ला संतप्त जमावाने आग लावली आहे. समता परिषदेचे बीड जिल्हाध्यक्ष सुभाष राऊत यांच्या मालकीचे हॉटेल आहे.
