पुणे/मुंबई : मुंबई-पुणे यशवंतराव चव्हाण द्रुतगती महामार्गावरील मिसिंग लिंकवरून प्रवास करणाऱ्या वाहनचालकांसाठी महत्त्वाची बातमी आहे. या मार्गावरील सुरक्षित वाहतूक सुनिश्चित करण्यासाठी वाहनांच्या प्रवेशाबाबत आणि वेगमर्यादेबाबत नवे नियम निश्चित करण्यात आले आहेत. १ नोव्हेंबर २०२६ पासून वाहतूक व्यवस्थेचा दुसरा टप्पा सुरू होणार असून, खासगी कारसाठी कमाल वेगमर्यादा १०० किमी प्रतितास, तर प्रवासी बससाठी ८० किमी प्रतितास असेल.
महाराष्ट्राचे अपर पोलीस महासंचालक (वाहतूक) प्रवीण साळुंके यांनी जारी केलेल्या अधिसूचनेनुसार, खासगी कार, जीप, एसयूव्ही आणि परवानगी असलेल्या इतर हलक्या मोटार वाहनांना मिसिंग लिंकचा वापर करता येणार आहे. तसेच प्रवासी बस आणि अधिकृत प्रवासी वाहनांनाही या मार्गावरून प्रवास करण्याची परवानगी असेल.
मिसिंग लिंकवर सर्व प्रकारच्या मालवाहू वाहनांना कायमस्वरूपी प्रवेशबंदी करण्यात आली आहे. यामध्ये पिकअप व्हॅन आणि टाटा एससारख्या हलक्या मालवाहू वाहनांचाही समावेश आहे. ज्वलनशील पदार्थ, स्फोटके किंवा इतर धोकादायक वस्तूंची वाहतूक करणाऱ्या वाहनांनाही या मार्गावर प्रवेश करता येणार नाही.
प्रवेशबंदी असलेल्या मालवाहू आणि अवजड वाहनचालकांनी मिसिंग लिंकऐवजी मुंबई-पुणे द्रुतगती महामार्गाच्या मूळ मार्गिकेचा वापर करावा, असे निर्देश देण्यात आले आहेत.
मिसिंग लिंकवरील निर्धारित वेगमर्यादा पुढीलप्रमाणे आहे.
– खासगी कार आणि इतर परवानगी असलेली हलकी मोटार वाहने : १०० किमी प्रतितास
– प्रवासी बस आणि इतर अधिकृत प्रवासी वाहने : ८० किमी प्रतितास
बोगद्यांमधून प्रवास करताना वाहनचालकांनी विशेष काळजी घ्यावी आणि निर्धारित वेगमर्यादेचे काटेकोर पालन करावे, असे आवाहन करण्यात आले आहे.
मिसिंग लिंकवर जाण्यापूर्वी आपल्या वाहनाला प्रवेशाची परवानगी आहे की नाही, याची खात्री करणे आवश्यक आहे. मालवाहू आणि धोकादायक पदार्थांची वाहतूक करणाऱ्या वाहनांनी या मार्गावर जाणे टाळून जुन्या द्रुतगती महामार्गाचा वापर करावा. नव्या नियमांमुळे मिसिंग लिंकवरील वाहतूक अधिक सुरक्षित आणि शिस्तबद्ध करण्याचा प्रयत्न करण्यात येत आहे.
