नाशिक: राज्यात (Local Body Elections) सध्या आगामी स्थानिक स्वराज्य संस्थांच्या निवडणुकांची जोरदार तयारी सुरू आहे. या पार्श्वभूमीवर उत्तर महाराष्ट्राच्या राजकारणात, विशेषतः सिन्नरमध्येही निवडणुकीच्या तोंडावर मोठ्या घडामोडी पाहायला मिळत आहे. अजित पवार गटाचे निष्ठावान समर्थक नामदेवराव लोंढे यांनी एकनाथ शिंदे यांच्या नेतृत्वाखालील शिवसेनेत प्रवेश केला आहे.
कोकाटेंना मोठा धक्का, नगराध्यक्षपदाची उमेदवारी
अचानक घेतलेल्या पक्षप्रवेशाच्या निर्णयामुळे सिन्नरमध्ये मंत्री माणिकराव कोकाटे यांना मोठा धक्का बसल्याचे मानले जात आहे. उपमुख्यमंत्री एकनाथ शिंदे यांच्यासोबत फोनवर चर्चा झाल्यानंतर, उपनेते विजय करंजकर आणि माजी खासदार हेमंत गोडसे यांच्या उपस्थितीत हा प्रवेश तातडीने पार पडला. प्रवेश होताच नामदेवराव लोंढे यांना शिंदेंच्या शिवसेनेकडून थेट नगराध्यक्षपदाचे उमेदवार म्हणून घोषित करण्यात आले, तसेच त्यांना आवश्यक ‘एबी फॉर्म’ देखील देण्यात आला आहे. समोर आलेल्या माहितीनुसार, लोंढे यांच्यासह सिन्नर नगर परिषदेच्या तीन माजी नगरसेवकांनीही त्याच वेळी शिंदेंच्या शिवसेनेत प्रवेश केला.
या राजकीय भूकंपाचे सिन्नरमधील निवडणुकीवर मोठे परिणाम होण्याची शक्यता आहे. या निर्णयामुळे सिन्नरमध्ये आता भगूरनंतर शिंदेंची शिवसेना स्वबळावर लढणार असल्याचे स्पष्ट झाल्याने लढत रंगतदार होणार असल्याचे चित्र स्पष्ट होते. स्थानिक राजकारणात घडत असलेल्या उलथापालथमुळे निकालावर काय परिणाम होणार हे पाहणे महत्वाचे ठरणार आहे.
