नाशिक: नाशिक हादरवून सोडणाऱ्या भोंदूबाबा अशोक खरात प्रकरणी विशेष तपास पथक (SIT) अधिक चौकशी करत आहेत. ‘श्रद्धा’ आणि ‘भक्ती’च्या नावाखाली खरातने महिलांच्या असहायतेचा फायदा घेत जे कृत्य केलं, ते आता हळूहळू समोर येत आहेत. स्वतःला ज्योतिष म्हणवून घेणारा हा भोंदू महिलांना आपल्या जाळ्यात ओढायचा आणि त्यांना गुंगीचं औषध देऊन त्यांच्यावर अत्याचार करत असल्याचं तपासात निष्पन्न झालं आहे.
तपासात समोर आलेल्या माहितीनुसार, खरात हा येणाऱ्या पीडित महिलांना विश्वासात घ्यायचा. त्यानंतर त्यांना एक विशिष्ट प्रकारचे ‘खारट पाणी’ प्यायला द्यायचा आणि ‘प्रसाद’ म्हणून पेढा खायला लावायचा. हे पदार्थ सेवन केल्यानंतर अवघ्या काही मिनिटांतच महिलांना मळमळणे, डोकं गरगरणे किंवा प्रचंड गुंगी येण्यासारखे प्रकार घडत असत. महिला अर्धवट शुद्धीत असताना, त्यांच्या हतबलतेचा फायदा घेऊन खरात केबिनमधील दिवे बंद करायचा आणि त्यांच्यावर अत्याचार करायचा.
खरात महिलांना जे द्रव पदार्थ द्यायचा, त्यात नेमके कोणते घटक होते? हे शोधणे आता पोलिसांसमोर सर्वात मोठे आव्हान आहे. सरकारी वकील शैलेंद्र बागडे यांनी न्यायालयात स्पष्ट केले की, खरात तपासात अजिबात सहकार्य करत नाहीये. या अमली पदार्थांचा स्रोत काय आहे, हे तो लपवून ठेवत आहे. त्यामुळे या प्रकरणाचा पर्दाफाश करण्यासाठी न्यायालयाने त्याच्या पोलिस कोठडीत वाढ करण्यात आली असून अधिक तपास सुरु आहे.
