नाशिक : दारू आणि जुगाराच्या व्यसनामुळे होणाऱ्या त्रासातून प्रेयसीने आपल्या प्रियकराच्या हत्येचा कट रचल्याचा धक्कादायक प्रकार नाशिकमध्ये समोर आला आहे. मित्रांच्या मदतीने प्रियकराचा जीव घेतल्यानंतर मृतदेहाची विल्हेवाट लावण्यासाठी तो तब्बल 18 तास घरातच ठेवण्यात आला. त्यानंतर रात्रीच्या वेळी कारमधून मृतदेह कसारा घाटात नेण्यात आला.
या प्रकरणातील मृत व्यक्तीचे नाव वसंत गोरखनाथ सातपुते (वय 40, रा. स्वराज्यनगर, पाथर्डी फाटा, नाशिक) असे आहे. पोलिसांच्या प्राथमिक तपासानुसार, वसंतला दारू आणि जुगाराचे व्यसन होते. या सवयींमुळे वारंवार वाद होत असल्याचे समोर आले आहे. त्यातूनच प्रेयसीने काही मित्रांच्या मदतीने वसंतला संपवण्याचा निर्णय घेतल्याचा संशय आहे.
हत्या केल्यानंतर लगेच मृतदेह बाहेर नेण्यात आला नाही. पोलिसांना संशय येऊ नये, यासाठी मृतदेह घरातच लपवून ठेवण्यात आला. सुमारे 18 तासांनंतर संशयितांनी मृतदेह कारमध्ये ठेवला आणि कसारा घाट गाठला. तेथे दरीत मृतदेह टाकून पुरावे नष्ट करण्याचा प्रयत्न करण्यात आल्याचे तपासात समोर आले आहे.
दरम्यान, घटनेची माहिती मिळताच नाशिक गुन्हे शाखेच्या युनिट-1 ने तपास सुरू केला. पोलिसांनी तांत्रिक माहिती तसेच गुप्त सूत्रांकडून मिळालेल्या माहितीनुसार संशयितांचा माग काढला. त्यानंतर कसारा घाट परिसरात शोधमोहीम राबवून वसंतचा मृतदेह पोलिसांनी शोधून काढला.
या प्रकरणात हसीना शेख, साहिल शहा आणि मोईन शहा या तिघांना पोलिसांनी ताब्यात घेतले आहे. हत्येमागील कारण, कट कसा रचण्यात आला आणि या प्रकरणात आणखी कोणाचा सहभाग आहे का, याचा तपास गुन्हे शाखेकडून सुरू आहे.
