पुणे: मुंबईच्या लोकल ट्रेनमध्ये महिलांच्या गळ्यातील सोन्याच्या साखळ्या आणि मंगळसूत्र चोरी करणाऱ्या 65 वर्षीय महिलेला रेल्वे पोलिसांनी अटक केली आहे. अनघा जोशी असे आरोपी महिलेचे नाव असून ती पुण्याची रहिवासी आहे. अनघाने कौटुंबिक अडचणींमुळे चोरीचा मार्ग स्वीकारल्याचे तपासात समोर आले आहे.
पोलिसांच्या माहितीनुसार, अनघाच्या मुलाचा अपघाती मृत्यू झाला होता, तर पतीचे दारूच्या व्यसनामुळे निधन झाले. त्यानंतर घरखर्च चालवणे कठीण झाल्याने तिने चोरी करण्यास सुरुवात केल्याचे सांगितले जाते. मात्र, तिच्या चोरी करण्याच्या पद्धतीमागे एक वेगळीच अंधश्रद्धा होती.
अनघा महिन्याच्या फक्त पहिल्या आणि तिसऱ्या शनिवारी पुण्याहून मुंबईत येत होती. शनिवार तिच्यासाठी शुभ आणि ‘लकी’ असल्याचा तिचा समज होता. त्यामुळे इतर दिवशी चोरी न करता ती ठराविक शनिवारीच लोकलमध्ये प्रवास करत महिलांना लक्ष्य करत असल्याचे तपासात आढळले.
2 मे रोजी दादर रेल्वे स्थानकावर बोरीवली लोकलमध्ये चढताना एका 44 वर्षीय महिला बँकरच्या गळ्यातील सुमारे 67,000 रुपयांची सोन्याची साखळी आणि पेंडंट चोरीला गेले. त्यानंतर 6 जून रोजी दादर स्थानकातच एका फायनान्स एक्झिक्युटिव्ह महिलेचे 89,000 रुपयांचे मंगळसूत्र आणि सोन्याची साखळी चोरीला गेली.
दोन्ही घटनांनंतर पोलिसांनी दादर स्थानकातील CCTV फुटेज तपासले. त्यावेळी महिला डब्याजवळ एक वृद्ध महिला संशयास्पदपणे फिरताना दिसली. पोलिसांनी तिच्यावर लक्ष ठेवले. तिसऱ्या महिलेच्या दागिन्यांना लक्ष्य करत असतानाच पोलिसांनी अनघाला रंगेहात पकडले.
चौकशीत तिने सुमारे 20 वर्षांपूर्वीही काही काळ चेन स्नॅचिंग केल्याची कबुली दिल्याचे पोलिसांनी सांगितले. मुंबईतून चोरलेले दागिने पुण्यात नेऊन सराफांकडे विकल्याची माहितीही तपासात समोर आली आहे. पोलिसांनी पुण्यातील सराफांकडून काही चोरीचे दागिने जप्त केले असून, अनघा जोशी सध्या न्यायालयीन कोठडीत आहे.
