जळगाव : देशद्रोहाच्या आरोपावरून ठाकरे गटाचे नाशिक महानगरप्रमुख सुधाकर बडगुजर यांची एसआयटी चौकशी केली जात आहे. त्याचप्रमाणे मंत्री गिरीश महाजन यांची देखील एसआयटी चौकशी झाली पाहिजे, अशी मागणी राष्ट्रवादी काँग्रेस नेते आमदार एकनाथ खडसे यांनी केली आहे. सलीम कुट्टा प्रकरणातभारतीय जनता पक्षाकडून शिवसेना ठाकरे गटावर टीका केली जात असताना आता खडसे यांनी महाजन यांच्यावर जोरदार निशाणा साधला आहे. त्यामुळे सलीम कुट्टा प्रकरणात राजकीय वातावरण चांगलेच तापणार असल्याचे दिसत आहे.
राष्ट्रवादी काँग्रेसचे नेते आमदार एकनाथ खडसे यांनी म्हटले की, तथ्य नसताना सुद्धा माझ्यावर दाऊदच्या बायकोसोबत संभाषण झाल्याचा आक्षेप घेण्यात आला होता. त्यानंतर माझी चौकशी करण्यात आली होती. आता फोटोच्या माध्यमातून मंत्री गिरीश महाजन यांचा सलीम कुट्टा याच्याशी संबंध दिसत आहे. देशद्रोहींशी गिरीश महाजन यांचे सरळ संबंध आहे का? असा प्रश्न खडसे यांनी उपस्थित केला आहे. एकनाथ खडसे यांनी गिरीश महाजनांची एसआयटी चौकशी करण्याची मागणी देखील केली आहे.
माझ्यावर आरोप झाले, त्यावेळी पक्षाने माझा राजीनामा घेतला होता. आता गिरीश महाजन यांच्यावर देशद्रोहाचे आरोप होत असून ते पुराव्यानिशी समोर देखील येत आहे. त्यामुळे मंत्रिमंडळात असताना गिरीश महाजन यांची चौकशी कशी होऊ शकेल? असा प्रश्न देखील एकनाथ खडसेंनी उपस्थित करत महाजन यांनी राजीनामा द्यावा, अशी मागणी खडसे यांनी केली.
