Crime News: नाशिक : नाशिक शहरात राजकीय वातावरण तापवणारी एक धक्कादायक घटना समोर आली आहे. नाशिक महानगरपालिका निवडणुकीत विजयी झालेले भाजप नगरसेवक शरद मोरे यांच्यावर पराभूत गटातील काही सदस्यांनी हल्ला केल्याचा प्रकार घडला आहे. अभिनंदन करण्याच्या बहाण्याने घरासमोर आलेल्या हल्लेखोरांनी थेट शरद मोरे यांच्यावर हल्ला केल्याने शहरात खळबळ उडाली आहे. या हल्ल्यात शरद मोरे जखमी झाले असून त्यांच्या पत्नी गीताही जखमी झाल्या आहेत.
ही घटना शुक्रवारी 16 जानेवारी रोजी रात्रीच्या सुमारास जेलरोड परिसरात घडली. शरद मोरे यांनी भाजपच्या तिकिटावर प्रभाग क्रमांक 18 मधून निवडणूक लढवली होती. त्यांच्या विरोधात शिवसेना शिंदे गटाच्या माजी नगरसेवक पवन पवार यांच्या आई आशा पवार या उमेदवार होत्या. आजारी असतानाही शरद मोरे यांनी प्रचार करत निवडणूक लढवली आणि कमी मतांनी आशा पवार यांचा पराभव केला होता.
निवडणूक निकालानंतर शरद मोरे आपल्या घराबाहेर असताना काही जण अभिनंदन करण्याच्या नावाखाली तेथे आले. त्यानंतर अचानक त्यांनी मोरे यांच्यावर हल्ला केला. तक्रारीनुसार, हल्लेखोरांनी पिस्तूलचा धाक दाखवत 50 लाख रुपयांची खंडणी मागितली आणि त्यांच्या गळ्यातील सोन्याची साखळी हिसकावून घेतली. या हल्ल्यात शरद मोरे जखमी झाले. त्यांना वाचवण्यासाठी पुढे आलेल्या त्यांच्या पत्नी गीता यांच्याही हातावर धारदार शस्त्राने हल्ला केला आणि या हल्ल्यात त्या जखमा झाल्या.
घटनेची माहिती मिळताच नाशिकरोड पोलिसांनी तातडीने तपास सुरू केला. या प्रकरणात अनुराग सागवान, यश गरुड, दीपक सदाफळे आणि विजयसिंग या चार संशयितांना ताब्यात घेण्यात आले आहे. तसेच बंटी काळे, किरण गाटोले, शुभम आदमाने, भूर्य खेडकर, प्रशांत सदाफळे, पवन पवार आणि विशाल पवार यांच्याविरुद्ध गुन्हा दाखल करण्यात आला आहे. खंडणी, खून करण्याचा प्रयत्न आणि दरोडा या कलमांखाली गुन्हा नोंदवण्यात आला आहे.
निवडणुकीतील पराभवाच्या रागातून हा हल्ला करण्यात आल्याचा संशय पोलिसांनी व्यक्त केला आहे. या प्रकरणाचा पुढील तपास सहाय्यक पोलिस निरीक्षक प्रवीण सूर्यवंशी करत आहेत.
