लोणी काळभोर, ता. 25 : पुणे ग्रामीण पोलिसांनी गुन्हेगारीविरोधात मोठी मोहीम राबवत जबरी चोरी, चेन स्नॅचिंग, घरफोडी आणि चोरीच्या गुन्ह्यांत सक्रिय असलेल्या दोन सराईत टोळ्यांचा पर्दाफाश केला आहे. या धडाकेबाज कारवाईत एकूण २३ गुन्ह्यांचा उलगडा करण्यात आला असून, सुमारे ४६ लाख रुपयांचा मुद्देमाल हस्तगत करण्यात आला आहे. जप्त करण्यात आलेल्या मुद्देमालात तब्बल ३२ तोळे सोन्याचे दागिने, मोटारसायकली आणि इतर साहित्याचा समावेश आहे.
पुणे ग्रामीणचे पोलीस अधीक्षक संदीप सिंह गिल यांच्या मार्गदर्शनाखाली स्थानिक गुन्हे शाखेने (LCB) रेकॉर्डवरील गुन्हेगारांवर विशेष लक्ष केंद्रित करत तपास सुरू केला. गुन्ह्यांची कार्यपद्धती, वेळ, ठिकाण, तसेच आरोपींच्या हालचालींचे बारकाईने विश्लेषण करण्यात आले. सीसीटीव्ही फुटेज, गोपनीय माहिती आणि साक्षीदारांच्या मदतीने पोलिसांनी आरोपींचा माग काढला.
पहिली टोळी पोलिसांच्या ताब्यात
मंचर येथील हर्षल दत्तात्रय तांदळे (वय २५) आणि महेश दत्तात्रय मंगळवेढेकर (वय २५) या दोघांना पारगाव हद्दीतील पोंदेवाडी फाटा परिसरातून अटक करण्यात आली. चौकशीत त्यांनी घरफोडी, चोरी आणि जबरी चोरीचे अनेक गुन्हे केल्याची कबुली दिली. त्यांच्याकडून सुमारे २० तोळे सोन्याचे दागिने, एक पल्सर मोटारसायकल आणि इतर साहित्य असा सुमारे २९ लाख रुपयांचा मुद्देमाल जप्त करण्यात आला.
या टोळीमुळे नारायणगाव, पारगाव, जुन्नर, घोडेगाव, आळेफाटा परिसरातील ६ गुन्ह्यांचा उलगडा झाला.
हर्षल तांदळे याच्यावर यापूर्वी ७ गुन्हे दाखल असून त्याच्यावर हद्दपारीची कारवाईही करण्यात आली होती. महेश मंगळवेढेकर याच्यावर दरोडा व चोरीचे गंभीर गुन्हे दाखल असल्याची माहिती समोर आली आहे.
दुसरी टोळीही पोलिसांच्या जाळ्यात
चेन स्नॅचिंग आणि जबरी चोरीच्या गुन्ह्यांमध्ये सक्रिय असलेला पियुष नानावत (वय १९, रा. कामशेत) याला स्थानिक गुन्हे शाखेने ताब्यात घेतले. चौकशीत त्याने अल्पवयीन साथीदारांच्या मदतीने गुन्हे केल्याची कबुली दिली. त्याच्याकडून १२ तोळे सोन्याचे दागिने आणि मोटारसायकल असा सुमारे १७ लाख रुपयांचा मुद्देमाल जप्त करण्यात आला.
या टोळीमुळे उरुळी कांचन, राजगड, भोर, वडगाव मावळ, खेड, शिरूर, दौंड, लोणावळा ग्रामीण, सासवड, वेल्हा, बारामती, यवत आणि जुन्नर येथील एकूण १७ गुन्ह्यांचा उलगडा झाला. पियुष नानावत हा काही महिन्यांपूर्वीच बाल सुधारगृहातून बाहेर आला असून, त्याच्यावर आधीही चोरी आणि चेन स्नॅचिंगचे गुन्हे दाखल असल्याचे तपासात उघड झाले आहे.
दरम्यान, गुन्ह्यांचा तपास करताना पोलिसांनी घटनास्थळी भेटी देऊन पुरावे गोळा केले, सीसीटीव्ही फुटेज तपासले आणि गोपनीय माहितीदारांच्या मदतीने आरोपींचा शोध घेतला. तीन स्वतंत्र तपास पथके तयार करून समांतर तपास राबविण्यात आला, ज्यामुळे कमी वेळेत मोठ्या प्रमाणावर गुन्ह्यांचा उलगडा करण्यात यश आले.
सदरची कामगिरी विशेष पोलीस महानिरीक्षक सुनिल फुलारी, पोलीस अधीक्षक संदीप सिंह गिल्ल, अपर पोलीस अधीक्षक रमेश चोपडे, गणेश बिरादार यांच्या मार्गदर्शनाखाली स्थानिक गुन्हे शाखेचे पोलीस निरीक्षक प्रमोद क्षीरसागर, पोलीस निरीक्षक शंकरराव पाटील, सचिन वांगडे, सुभाष चव्हाण, सचिन कांडगे, स्थानिक गुन्हे शाखेचे सहाय्यक पोलीस निरीक्षक महादेव शेलार, राहुल गावडे, दत्ताजीराव मोहिते, पोलीस उपनिरीक्षक अभिजीत सावंत,भाऊसाहेब लोकरे, पोलीस अंमलदार दिपक साबळे, संदिप वारे, अक्षय नवले, विक्रमसिंह तापकीर, हेमंत विरोळे, अतुल डेरे, राजु मोमीण, निलेश सुपेकर, तुषार भोईटे, सागर नामदास, अजित भुजबळ, सचिन घाडगे, धिरज जाधव, असिफ शेख, योगेश नागरगोजे, राहुल पवार, समाधान नाईकनवरे, नंदा कदम, सुजाता कदम, सचिन गिलबिले, मंगेश अभंग, संजय साळवे यांच्या पथकाने केली आहे,
