Pune News : पुणे : विद्येचे माहेरघर मानले जाणारे पुणे शहर पुन्हा एकदा गोळीबाराच्या घटनेने हादरले आहे. वारजे परिसरातील चैतन्य चौकात शुक्रवारी सायंकाळी एका सलूनमध्ये घुसून ३-४ जणांच्या टोळीने गोळीबार केला. या जीवघेण्या हल्ल्यात दोन तरुण जखमी झाले असून, पोलिसांनी गुन्हेगारी टोळीतील एका सदस्याला घटनास्थळावरूनच ताब्यात घेतले आहे. भरवस्तीत आणि गर्दीच्या वेळी झालेल्या या प्रकारामुळे पुण्याच्या कायदा व सुव्यवस्थेवर पुन्हा एकदा प्रश्नचिन्ह उपस्थित झाले आहे. Pune News
मिळालेल्या माहितीनुसार, शुक्रवारी सायंकाळी आठ वाजेच्या सुमारास निहाल शिंदे हा वारजे येथील चैतन्य चौकातील एका सलूनमध्ये केस कापण्यासाठी बसला होता. यावेळी अचानक 3 ते 4 जण दुकानात घुसले आणि त्यांनी निहालवर गोळीबार केला. एक गोळी निहालच्या डाव्या कानाजवळून घासून गेल्याने तो गंभीर जखमी झाला. या हल्ल्यादरम्यान झालेल्या झटापटीत अमोल आढाव हा तरुणही जखमी झाला आहे. Pune News
गोळीबार झाला तेव्हा परिसरात मोठी वर्दळ होती. धक्कादायक बाब म्हणजे, गोळीबार करताना वापरलेली बंदूक आरोपीच्या हातातच फुटल्याची माहिती समोर आली आहे. यामुळे गोळीबार करणाऱ्या आरोपीच्या हातालाही जखम झाली. यावेळी गुन्हे शाखेच्या तपास पथकाने दाखवलेल्या तत्परतेमुळे आरोपी साहिल राऊत याला घटनास्थळावरूनच ताब्यात घेण्यात आले. पोलिसांनी वेळीच हस्तक्षेप केल्याने पुढील मोठा अनर्थ टळला. Pune News
हल्ल्याचे कारण काय?
या घटनेबाबत माहिती देताना पोलीस उपायुक्त संभाजी कदम यांनी सांगितले की, जखमी निहाल शिंदे आणि आरोपी यांच्यात जानेवारी 2023 पासून वाद सुरू होता. याच पूर्ववैमनस्यातून हा हल्ला झाल्याचे प्राथमिक तपासात निष्पन्न झाले आहे. पोलिसांनी या प्रकरणातील एकूण पाच आरोपींची ओळख पटविली असून इतर आरोपींच्या शोधासाठी पथके रवाना करण्यात आली आहेत. Pune News
