अहमदनगर : अहमदनगर मध्ये एसटी महामंडळाच्या बसचा अपघात झाला आहे. प्रवाशांनी भरलेली बस उलटल्याने मोठं अपघात घडला आहे. या अपघातात काही शालेय विद्यार्थी जखमी झाले आहेत. जखमी विद्यार्थ्यांवर रुग्णालयात दाखल करण्यात आले असून त्यांच्यावर प्राथमिक उपचार करण्यात आले आहेत.
मिळालेल्या माहितीनुसार, अहमदनगरमधील संगमनेरमध्ये संगमनेर तालुक्यातील पिंपरणे गावात ही घटना घडली आहे. प्रवाशांनी भरलेली ही बस राहुरीकडून संगमनेरच्या दिशेने निघाली होती. वाटेतच बसचे एक्सेल तुटले. त्यामुळे वाहन चालकाचे वाहनावरील नियंत्रण सुटल्याने प्रवाशांनी भरलेली बस रस्त्यावर पलटी झाली. अपघातात सुदैवाने कोणतीही जीवितहानी झाली नाही.
संगमनेर तालुक्यातील पिंपरणे गावातून जात असताना हा अपघात झाला आहे. सकाळची वेळ असल्याने गावातील अनेक विद्यार्थी शाळेत जाण्यासाठी निघाले होते. अपघाताची माहिती मिळताच मुलांच्या पालकांना ही माहिती कळवण्यात आली. आपल्या लेकरांच्या काळजीने आई वडिलांचा जीव कासावीस झाला होता. जखमी विद्यार्थ्यांना उपचारासाठी संगमनेरला हलवण्यात आलं आहे.
