पुणे: पुण्यातील बांधकाम व्यावसायिक केतन अग्रवाल हत्या प्रकरणाच्या तपासात आता नवे वळण आले आहे. या प्रकरणात चेतन चौधरीच्या वर्गमित्र असलेल्या एका तरुणाची पोलीस चौकशी सुरू करण्यात आली आहे. केतनच्या हत्येचा कथित कट याच तरुणाला सर्वप्रथम सांगण्यात आल्याची माहिती तपासातून समोर आल्याने त्याची भूमिका तपासली जात आहे.
सूत्रांच्या माहितीनुसार, 18 जून रोजी लोहगड किल्ल्यावर केतन अग्रवाल यांना दरीत ढकलून देण्यापूर्वी चेतन चौधरी आणि सिया गोयल यांनी या तरुणाशी चर्चा केली होती. दोघांनी त्याला त्या दिवशी लोहगडावर ट्रेकिंगसाठी सोबत येण्याचेही सांगितले होते. मात्र, त्याने जाण्यास नकार दिल्याचे समोर आले आहे.
तपासात आणखी एक महत्त्वाची बाब समोर आली आहे. केतनच्या मृत्यूनंतर चेतन चौधरी सर्वप्रथम याच वर्गमित्राला भेटल्याची माहिती पोलिसांना मिळाली आहे. तसेच सिया गोयलनेही घटनेनंतर त्याच्याशी संपर्क साधल्याचे समोर आले आहे. या भेटीत आणि संभाषणात नेमकी काय चर्चा झाली, याचा तपास पोलीस करत आहेत.
पोलिसांसमोर सध्या महत्त्वाचा प्रश्न असा आहे की, जर या तरुणाला कथित कटाची आधीपासून माहिती होती, तर त्याने याबाबत कोणालाही माहिती का दिली नाही? याच दृष्टीने त्याची सखोल चौकशी केली जात आहे.
पोलिसांच्या माहितीनुसार, संबंधित तरुण हा बीड जिल्ह्याचा रहिवासी असून सध्या पुण्यातील बालेवाडी येथील एका खासगी कंपनीत नोकरी करतो. मे महिन्याच्या शेवटच्या आठवड्यापासून चेतन चौधरी त्याच्या सातत्याने संपर्कात असल्याचेही तपासात समोर आले आहे.
दरम्यान, पोलिसांनी या तरुणाचे कॉल डिटेल रेकॉर्ड, चॅट, लोकेशन हिस्ट्री आणि इतर डिजिटल पुरावे तपासण्यास सुरुवात केली आहे. या तपासातून हत्या प्रकरणाशी संबंधित आणखी महत्त्वाची माहिती समोर येण्याची शक्यता व्यक्त केली जात आहे.
