पुणे : राज्यातील शाळकरी मुले आणि तरुणांच्या आरोग्याशी होणारी तडजोड रोखण्यासाठी राज्य सरकारने एक अत्यंत महत्त्वाचा पाऊल उचलले आहे. शाळा आणि महाविद्यालयीन परिसराच्या 500 मीटरच्या आत ‘स्टिंग’या लोकप्रिय एनर्जी ड्रिंकच्या विक्रीवर तातडीने बंदी घालण्याचे आदेश देण्यात आले आहेत.
विधानसभेत या पेयाच्या दुष्परिणामांबाबत उपस्थित केलेल्या प्रश्नावर गंभीर दखल घेत, विधानसभा उपाध्यक्ष नरहरी झिरवळ यांनी प्रशासनाला ही कडक कारवाई करण्याचे निर्देश दिले आहेत. त्यानुसार शाळा आणि महाविद्यालयीन परिसराच्या 500 मीटरच्या आत ‘स्टिंग’ला बंदी असणार आहे.
आमदार विक्रम पाचपुते यांनी या विषयाकडे सभागृहाचे लक्ष वेधले. ते म्हणाले की, हे पेय ऊर्जा देण्याच्या नावाखाली विकले जात असले, तरी त्यात साखरेचे प्रमाण प्रचंड जास्त असून कृत्रिम द्रव्यांचा वापर केला जातो. कंपनीच्या बाटलीवरच ‘हे पेय लहान मुले आणि गरोदर महिलांसाठी योग्य नाही’ असे लिहिलेले असते. मात्र, तरीही शाळकरी मुलांना याची सवय लागत असून, ते आरोग्यासाठी अत्यंत घातक ठरत आहे. याशिवाय शाळा परिसरात फ्लेवर मिल्कच्या नावाखाली होणारी दुधाची भेसळ आणि अमली पदार्थांच्या विक्रीचीही चौकशी करण्याची मागणी त्यांनी केली.
याबाबत सरकारने स्पष्ट केले आहे की, शाळांजवळ या पेयांची विक्री रोखण्यासाठी विशेष देखरेख ठेवली जाईल. लवकरच यासाठी सविस्तर नियमावली जाहीर केली जाईल. तसेच, भेसळयुक्त अन्नपदार्थांच्या तपासणीसाठी राज्यात सध्या असलेल्या ३ प्रयोगशाळांशिवाय, पीपीपी तत्त्वावर आणखी २२ नवीन लॅब सुरू केल्या जात असल्याची माहितीही सरकारने दिली आहे. पालकांनी आणि शिक्षकांनीही मुलांच्या या सवयींबाबत जागरूक राहणे गरजेचे आहे.
तसेच राज्यात अन्न व औषधाच्या नमुन्याच्या तपासणीसाठी सध्या संभाजीनगर, नागपूर, मुंबई येथे तीन प्रयोगशाळा उभारण्यात आल्या आहेत. सरकारच्या हा निर्णय मुलाच्या आरोग्याच्या दृष्टीने महत्वाचा आहे.
