हिंगोली: महाराष्ट्रात पुन्हा एकदा कोरोनाने डोके वर काढले आहे. दिवसेंदिवस राज्यात कोरोना बाधितांची संख्या वाढत आहे. असे असताना हिंगोली जिल्ह्यात डॉक्टरांचा हलगर्जीपणा समोर आला आहे. चक्क कोरोना बाधित रुग्ण रुग्णालयातून पळून गेला आहे. या घटनेने जिल्हा आरोग्य विभागात एकच खळबळ उडाली असून, या रुग्णाचा शोध घेतला जात आहे. याबाबत पोलिसांना देखील माहिती देण्यात आली असून, पोलिसांचे पथक देखील या व्यक्तीला शोधत आहे.
हिंगोली शहरातील जिल्हा रुग्णालयात रविवारी एक कोरोनाचा संशयीत रूग्ण तपासणीनंतर कोरोना पॉझिटिव्ह आढळून आला. यानंतर डॉक्टरांनी प्रथमोपचार केले आणि त्याला रुग्णालयात दाखल करून घेण्याची प्रक्रिया सुरू केली. मात्र, त्यावेळी हा रुग्ण कुणालाही काहीही न सांगताच जिल्हा रुग्णालयातून पळून गेला. शेवटी संशयित रूग्ण कुठेच दिसत नसल्याने डॉक्टरांनी त्याची शोधाशोध केली. परंतु, सोमवारपर्यंत तरी तो सापडला नव्हता, अशी माहिती सूत्रांनी दिली आहे. त्यामुळे, या रुग्णाच्या संपर्कात येणाऱ्या लोकांना देखील कोरोनाची लागण होण्याची शक्यता आहे.
सरम्यान राज्यात कोरोनाची वाढती रुग्ण संख्या लक्षात घेता आता शासकीय रुग्णालयात संशयित रुग्णाची कोरोना चाचणी केली जात आहे. रविवारी हिंगोली शहरातील जिल्हा रुग्णालयात एक व्यक्ती छातीत वेदना होत असल्याने उपचारासाठी आला होता. त्याला दम्याचा त्रास होता. त्याची तपासणी केली असता, तो कोरोना संशयित आढळला. सुरुवातीला त्याला औषधे देण्यात आले. सोबतच, पुढील उपचारासाठी त्याला रुग्णालयात दाखल करून घेण्याची तयारी सुरू होती. मात्र, पुढील उपचार न घेताच हा रुग्ण दवाखान्यातून निघून गेल्याचे जिल्हा रुग्णालयातून सांगण्यात येत आहे.
हिंगोली जिल्हा शासकीय रुग्णालयातून कोरोनाचा संशयित रुग्ण पळून गेल्याने मोठी खळबळ उडाली आहे. दरम्यान, या रुग्णावर प्राथमिक उपचारही करण्यात आले होते. मात्र, आता काही डॉक्टर चक्क कानावर हात ठेवत मला काही माहितीच नाही, असे सांगत आहेत. त्यामुळे आता या रुग्णाचा शोध घेऊन, त्याच्यावर उपचार करण्याचे आरोग्य विभागासमोर आव्हान असणार आहे.
