फुरसुंगी, ता. ३ : प्रेमविवाह करून संसार सुरू केलेल्या २५ वर्षीय विवाहितेने गळफास घेऊन आत्महत्या केल्याची घटना घडली आहे. याप्रकरणी तिच्या पतीसह त्याच्या कथित प्रेयसीविरुद्ध आत्महत्येस प्रवृत्त केल्याचा गुन्हा फुरसुंगी पोलीस ठाण्यात दाखल करण्यात आला आहे. मृत विवाहितेच्या मोबाईलमधील ‘Keep Notes’ अॅपमध्ये आढळलेल्या मजकुरानंतर या प्रकरणाला नवे वळण मिळाले आहे.
वृषाली भिमराव आरडे (लग्नानंतर वृषाली रोहित घोडे, वय २५) असे आत्महत्या केलेल्या विवाहितेचे नाव आहे. रोहित मच्छिंद्र घोडे आणि तृप्ती वाकचौरे असे गुन्हा दाखल करण्यात आलेल्या आरोपींची नावे आहेत. याप्रकरणी मृत विवाहितेची आई लक्ष्मी भिमराव आरडे (रा. शहा, ता. इंदापूर) यांनी फुरसुंगी पोलीस ठाण्यात फिर्याद दिली आहे.
पोलिसांनी दिलेल्या माहितीनुसार, वृषाली भिमराव आरडे (लग्नानंतर वृषाली रोहित घोडे, वय २५) हिने सप्टेंबर २०२१ मध्ये रोहित मच्छिंद्र घोडे याच्यासोबत प्रेमविवाह केला होता. लग्नानंतर काही काळ बारामती येथे वास्तव्यानंतर दोघे पुण्यात वास्तव्यास आले होते. मागील दोन वर्षांपासून ते उरुळी देवाची येथील वैष्णव सिटी परिसरात राहत होते. वृषालीचा पती रोहित घोडे हा डी-मार्टमध्ये कार्यरत असून त्याच्यासोबत काम करणाऱ्या तृप्ती वाकचौरे हिच्याशी त्याचे विवाहबाह्य संबंध असल्याचा संशय वृषालीला आला होता.
यावरून पती-पत्नीमध्ये वारंवार वाद होत असल्याचे तसेच रोहित घोडे याच्याकडून शिवीगाळ, मारहाण आणि मानसिक छळ केला जात असल्याचा आरोप फिर्यादीत करण्यात आला आहे. सततच्या वादामुळे वृषाली काही दिवस नाशिक येथे भावाकडे गेली होती. त्यानंतर कुटुंबीयांनी समेट घडवून आणत १३ जून रोजी तिला पुन्हा पतीकडे सोडले. त्यावेळीही रोहितला कथित संबंध संपवून संसाराकडे लक्ष देण्याची समज दिल्याचे फिर्यादीत म्हटले आहे. मात्र, त्यानंतरही वाद कायम राहिल्याचा आरोप करण्यात आला आहे.
२७ जून रोजी वृषालीने राहत्या घरी गळफास घेतल्याची माहिती शेजाऱ्यांनी तिच्या आईला दिली. तिला तातडीने रुग्णालयात नेण्यात आले; मात्र डॉक्टरांनी तिला मृत घोषित केले. शवविच्छेदन अहवालात मृत्यूचे कारण गळफासामुळे झाल्याचे नमूद करण्यात आले आहे.
दरम्यान, मृत वृषालीचा मोबाईल तपासताना तिच्या भावाला ‘Keep Notes’ अॅपमध्ये लिहिलेली नोंद आढळून आली. त्यामध्ये आपल्या मृत्यूस पती रोहित घोडे आणि त्याचे तृप्ती वाकचौरे हिच्यासोबतचे कथित विवाहबाह्य संबंध, तसेच त्यांच्याकडून होणारा मानसिक व शारीरिक त्रास कारणीभूत असल्याचा उल्लेख असल्याचा दावा फिर्यादीत करण्यात आला आहे.
या तक्रारीच्या आधारे फुरसुंगी पोलिसांनी रोहित मच्छिंद्र घोडे आणि तृप्ती वाकचौरे यांच्याविरुद्ध आत्महत्येस प्रवृत्त केल्याप्रकरणी गुन्हा दाखल केला असून, सहाय्यक पोलीस निरीक्षक संतोष मोरे यांच्या मार्गदर्शनाखाली पुढील तपास सुरू आहे.
