Ashok Kharat Case: नाशिक: महाराष्ट्रात सध्या अंधश्रद्धा आणि महिलांच्या शोषणाचे गंभीर केंद्र बनलेल्या भोंदूबाबा अशोक खरात ऊर्फ कॅप्टन याच्या प्रकरणाने संपूर्ण राज्य हादरले आहे. अध्यात्माच्या नावाखाली महिलांवर अत्याचार करणाऱ्या या भोंदूबाबाचे आता अनेक बड्या राजकीय नेत्यांशी असलेले संबंध उघड झाले आहेत. या प्रकरणामुळे राज्यातील राजकारण चांगलेच तापले असून, दररोज नवनवीन माहिती समोर येत आहे.
विशेष म्हणजे, शिवसेना नेते संजय राऊत यांनी या प्रकरणात अत्यंत खळबळजनक आरोप केले आहेत. सध्याच्या मंत्रिमंडळातील 9 मंत्री हे या भोंदूबाबाचे भक्त होते आणि ते त्याच्या सांगण्यावरून घृणास्पद अघोरी विधी करायचे, असा दावा राऊत यांनी केला आहे. या आरोपामुळे राजकीय वर्तुळात मोठी खळबळ उडाली आहे. इतकेच नाही तर, अशोक खरात याचे विविध पक्षांतील दिग्गज नेत्यांसोबतचे फोटो आता समाजमाध्यमांवर वेगाने व्हायरल होत आहेत. यामध्ये मुख्यमंत्री एकनाथ शिंदे, मंत्री राधाकृष्ण विखे पाटील, खासदार निलेश लंके, आमदार दीपक केसरकर, आमदार जयंत पाटील आणि मिलिंद नार्वेकर यांसारख्या मोठ्या नेत्यांचा समावेश असल्याचे दिसून येत आहे.
अशोक खरात याने या बड्या नेत्यांच्या नावाचा आणि पदाचा गैरवापर करून कोट्यवधी रुपयांची संपत्ती जमा केल्याचा आरोपही आता केला जात आहे. महिलांचे शोषण करण्यासाठी अध्यात्माचा मुखवटा वापरणाऱ्या या भोंदूबाबाला नक्की कोणाचे अभय होते, असा प्रश्न आता सर्वसामान्य जनतेकडून विचारला जात आहे. मंत्रिमंडळातील ते 9 मंत्री नक्की कोण आहेत आणि त्यांनी खरंच असे अघोरी विधी केले आहेत का, याचा शोध घेणे आता पोलिसांसमोर मोठे आव्हान आहे. राजकीय नेत्यांचे असे अंधश्रद्धेला खतपाणी घालणारे वर्तन राज्याला कोणत्या दिशेला घेऊन जात आहे, अशी भीती व्यक्त केली जात आहे. आता गृहखाते या प्रकरणाची सखोल चौकशी करून ‘कॅप्टन फाईल्स’मधील त्या मंत्र्यांची नावे जनतेसमोर आणणार का, याकडे सर्वांचे लक्ष लागले आहे.
