न्हावरे : न्हावरे परिसरात एमडी ड्रग्सविरोधात स्थानिक गुन्हे शाखा(एलसीबी), शिरूर आणि न्हावरे पोलिसांनी केलेल्या संयुक्त कारवाईनंतर या प्रकरणाचे धागेदोरे आता शिरूर, दौंड आणि रांजणगाव गणपती एमआयडीसी परिसरापर्यंत पोहोचल्याचे समोर आले आहे. न्हावरेतील तिघांना अटक करण्यात आली असून,पुढील तपासात आणखी ३ ते ४ जण आरोपी म्हणून निष्पन्न झाल्याची माहिती पोलिस सूत्रांकडून मिळाली आहे.त्यामुळे एमडी ड्रग्सच्या रॅकेटची साखळी अधिक व्यापक असल्याचे स्पष्ट होत आहे.
पोलिसांना मिळालेल्या गोपनीय माहितीनुसार,न्हावरे-तळेगाव महामार्गालगत असलेल्या शेळके वस्ती परिसरात बुधवारी(ता.२६) सापळा रचून ही कारवाई करण्यात आली होती. यावेळी संबंधित तिघांकडून सुमारे ५७ ग्रॅम एमडी ड्रग्स जप्त करून त्यांना अटकही केली होती.त्यानंतर पोलिसांनी कोर्टाकडे संबंधित आरोपींकडून अधिक माहिती मिळवण्यासाठी पीसीआरची मागणी केली होती.त्यानुसार कोर्टाने पीसीआर मंजूर केला होता. त्यानंतर पोलिसांनी पीसीआरमध्ये संबंधित तिन्ही आरोपींकडून माहिती काढून पुढील तपासाला वेग दिला आहे.
शिरूर-दौंड-रांजणगाव एमआयडीसी कनेक्शन
कारवाईनंतर पोलिसांनी तपासाची चक्रे वेगाने फिरवली असता या एमडी ड्रग्स प्रकरणाचे धागेदोरे शिरूर आणि दौंड तालुक्यासह रांजणगाव गणपती एमआयडीसी परिसराशी जोडले जात असल्याची माहिती समोर आली आहे. तपासादरम्यान आणखी ३ ते ४ जण आरोपी म्हणून निष्पन्न झाल्याने या रॅकेटमागे मोठी साखळी कार्यरत असल्याचा संशय बळावला आहे.
रांजणगाव गणपती एमआयडीसी सारख्या औद्योगिक परिसराशी या प्रकरणाचे कनेक्शन समोर आल्याने पोलिस तपासाला विशेष महत्त्व प्राप्त झाले आहे.एमडीचा पुरवठा नेमका कुठून होत होता, त्याचे वितरण कोणत्या माध्यमातून केले जात होते आणि या साखळीमागे मुख्य सूत्रधार कोण आहे.याचा शोध घेण्यासाठी पोलिसांकडून तपास सुरू आहे.
एमडीची साखळी किती खोलवर?
न्हावरेपासून सुरू झालेला तपास शिरूर-दौंड तालुक्यांसह रांजणगाव गणपती एमआयडीसीपर्यंत पोहोचल्याने एमडी ड्रग्सचा विळखा नेमका किती दूरवर पसरला आहे, याबाबत गंभीर प्रश्न निर्माण झाला आहे.या रॅकेटमध्ये आणखी किती जणांचा सहभाग आहे आणि तरुणांना एमडीचा पुरवठा करणारी साखळी किती मोठी आहे.याचा उलगडा पुढील तपासातून होण्याची शक्यता आहे.
पोलिस सूत्रांच्या माहितीनुसार,या प्रकरणाच्या मुळापर्यंत पोहोचण्यासाठी तपास सुरू असून,पुढील काळात आणखी काही आरोपी आणि महत्त्वाचे धागेदोरे समोर येण्याची शक्यता आहे.
‘शॉर्टकट’च्या नादात आयुष्य उद्ध्वस्त होऊ नये!
श्रीमंत होण्यासाठी कष्टाला पर्याय नाही.झटपट पैसा मिळविण्याच्या मोहात चुकीचा आणि बेकायदेशीर मार्ग स्वीकारल्यास त्याचा परिणाम केवळ संबंधित व्यक्तीवर होत नाही,तर त्याचे कुटुंब आणि समाजालाही त्याची मोठी किंमत मोजावी लागते.
अंमली पदार्थांच्या विळख्यात तरुणाई अडकणे ही समाजासाठी अत्यंत गंभीर बाब आहे.त्यामुळे कुटुंबातील ज्येष्ठ सदस्यांनी आपल्या मुलांच्या वर्तणुकीकडे, मित्रपरिवाराकडे आणि दैनंदिन हालचालींकडे काटेकोरपणे लक्ष देणे गरजेचे आहे.तरुणांनीही शॉर्टकटच्या मोहाला बळी न पडता शिक्षण,व्यवसाय आणि कष्टाच्या मार्गाने आपले भविष्य घडविण्याची गरज आहे.
न्हावरेतील एमडी ड्रग्स कारवाईनंतर उघड होत असलेले शिरूर-दौंड-रांजणगाव एमआयडीसी कनेक्शन पाहता,या रॅकेटची पाळेमुळे किती खोलवर आहेत,याचा उलगडा पोलिसांच्या पुढील तपासातून होणार आहे.
