अहमदनगर : अहमदनगर जिल्ह्यातील निर्मळ पिंप्री गावात 400 ते 500 लोकांच्या जमावाने दोन कुटूंबावर जिवघेणा हल्ला केल्याची धक्कादायक प्रकार समोर आला आहे. नुकत्याच झालेल्या ग्रामपंचायत निवडणूकीच्या पार्श्वभूमीवर हा हल्ला झाल्याच बोललं जात आहे. संतप्त झालेल्या चारशे ते पाचशे लोकांच्या जमावाने घराची तोडफोड आणि जाळपोळ करत यांचं मणिपूर करा असं सांगण्यात येत असल्याचा आरोप पिडीत कुटुंबाच्या वतीने करण्यात आला आहे.
या प्रकरणी लोणी पोलीस ठाण्यात 71 जणांविरोधात अॅट्रोसीटीसह मारहाण केल्याचा गुन्हा दाखल करण्यात आला असून यामध्ये 20 ते 25 जण अनुसूचित जातीचे आरोपी आहेत. या घटनेमुळे घाबरलेल्या कुटुंबाने रात्रीपासून लोणी पोलीस स्टेशनमध्ये ठाण मांडल आहे. गावात सध्या पोलीस बंदोबस्त तैनात करण्यात आला असून तणावपर्ण शांतता आहे.
दरम्यान, महिलेने पोलिसांत दिलेल्या फिर्यादीनुसार, काही दिवसांपूर्वी गावातील लोकांसोबत त्यांच्या मुलाचा वाद झाला होता. मात्र, गावकऱ्यांच्या पुढाकाराने हा वाद मिटला देखील होता. दरम्यान, बुधवारी अचानक गावातील मोठा जमाव या महिलेच्या घरी आला. यात काही महिलांचा देखील समावेश होता.
याच जमावातील काही लोकांनी घरात घुसुन टीव्ही तसेच घरातील तीन गव्हाची पोती बाहेर फेकले. तेंव्हा समोरील मोठी गर्दी पाहुन आणि आवाज ऐकुन महिलेसह घरातील लोकांनी घराचा दरवाजा लावून घेतला. मात्र, त्यानंतर जमलेल्या लोकांनी दरवाजावर लाथा मारुन घरावर दगडफेक करून घराच्या पाठीमागील शेळयाचे पत्र्याचे शेडनेट पेटवून दिले. या घटनेची माहिती पोलिसांनी मिळताच पोलीस घटनास्थळी दाखल झाले, यामुळे मोठा अनर्थ टळला.
लहान मुलांना मारहाण
यावेळी आलेल्या जमावाने महिलेच्या घरासमोरील पाण्याची टाकी फोडली, तसेच गादया पलंग फेकुन दिले. तसेच घरासमोरील असलेले शेड पाडले. घराच्या पत्र्यावर आणि घरावर दगडफेक केली. तसेच फिर्यादी महिलेच्या पुतण्याची घरासमोरील टाटा मॅजीक गाडी पलटी करुन तिचे देखील नुकसान केलं आहे. घरातील लहान मुलांना देखील मारहाण करण्यात आल्याचा आरोप महिलेकडून करण्यात आला आहे.
