अहमदनगर : अहमदनगर जिल्ह्यातील श्रीगोंदा तालुक्यात एक धक्कादायक घटना घडली आहे. 9 वर्षाच्या अल्पवयीन मुलीवर सामूहिक बलात्कार केल्याची घटना उघडकीस आली आहे. याप्रकरणी श्रीगोंदा पोलीस ठाण्यात पोक्सो ॲट्रॉसिटीसह सामूहिक बलात्काराचा गुन्हा दाखल करण्यात आला असून दोघांना अटक करण्यात आली आहे.
संतोष रामभाऊ पवार आणि युवराज नंदू शेंडगे अशी अटक करण्यात आलेल्या व्यक्तीची नावे आहेत. धक्कादायक बाब म्हणजे मुलीवर बलात्कार करत असताना व्हिडीओ शूटिंग केल्याचंही समोर आलं आहे. या व्हिडीओबाबत नातेवाईकांना समजले तेव्हा ही घटना लक्षात आली.
पोलिसांनी दिलेल्या अधिक माहितीनुसार, श्रीगोंदा तालुक्यातील दक्षिणेकडील एका खेडे गावात ही घटना घडली आहे. एका अल्पवयीन म्हणजे नऊ वर्षाच्या मुलीवर दोघांनी सामूहिक बलात्कार केला. या प्रकरणी श्रीगोंदा पोलीस ठाण्यात गुन्हा दाखल करण्यात आला आहे. यातील मुख्य आरोपी संतोष पवार आणि युवराज शेंडगे यांनी या मुलीसोबत एक महिन्यांपासून वारंवार जबरी शारीरिक संबंध ठेवले. त्याचे मोबाईल चित्रीकरण केल्यानंतर नातेवाईकांनी पहिले आणि ही बाब त्यांच्या लक्षात आली.
मोबाईलमधील व्हिडीओबाबत दोघांना विचारणा केली असता त्यांनी सुरुवातीला उडवा उडवीची उत्तर दिली. मात्र प्रकरण अंगाशी येत आहे हे लक्षात आल्यानंतर त्यांनी घडलेल्या सर्व सगळा प्रकार सांगितला. यानंतर मुलीच्या नातेवाईकांनी पोलीस ठाण्यात तक्रार दाखल केली. यावरून पोलिसांनी दोघांना अटक केले असून त्यांना न्यायालयात हजर केले. त्यांना १४ मार्चपर्यंत पोलीस कोठवडी सुनावण्यात आली आहे.
