उरुळी कांचन, (पुणे) : विवाहित महिलेचे गुपचूप अश्लील फोटो काढून, ते फोटो सोशल मीडियावर आणि तिच्या पती व भावाला पाठवण्याची धमकी देत तब्बल दोन वर्षे जबरीने शारीरिक संबंध ठेवणाऱ्या आरोपीच्या मुसक्या उरुळी कांचन पोलिसांनी आवळल्या आहेत. याप्रकरणी आरोपीवर विविध कलमान्वये आरोपीवर गुन्हा दाखल करण्यात आला आहे. ही घटना जुलै 2024 ते ऑगस्ट 2026 या कालवधीत घडली.
प्रतिक उर्फ गुड्ड्या बाळू गायकवाड (रा. हिंगणगाव, ता. हवेली, जि. पुणे) असे अटक करण्यात आलेल्या नराधमाचे नाव आहे. याबाबत एका पिडीतेने उरुळी कांचन पोलीस ठाण्यात फिर्याद दिली आहे.
पोलिसांनी दिलेल्या माहितीनुसार, आरोपी प्रतिक उर्फ गुड्ड्या गायकवाड याने जुलै 2024 मध्ये पीडित महिलेला फसवून एका लॉजवर नेले होते. तेथे तिच्या इच्छेविरुद्ध जबरदस्तीने शारीरिक संबंध प्रस्थापित केले. एवढ्यावरच न थांबता, आरोपीने पीडितेच्या नकळत आक्षेपार्ह आणि अश्लील अवस्थेतील फोटो आपल्या मोबाईलमध्ये काढले.
पहिल्या घटनेनंतर आरोपी गुड्ड्याने “माझ्यासोबत लॉजवर आली नाहीस किंवा कोणाला काही सांगितलेस, तर तुझे हे अश्लील फोटो तुझ्या नवऱ्याला आणि भावाला पाठवून तुझा संसार उद्ध्वस्त करेन,” अशी धमकी त्याने पीडितेला दिली. या मानसिक दबावाखाली आणि भीतीपोटी पीडित महिला गप्प राहिली.
याच ब्लॅकमेलिंगचा गैरफायदा घेत आरोपी गुड्ड्या गायकवाड याने जुलै 2024 ते ऑगस्ट 2026 या तब्बल दोन वर्षांच्या प्रदीर्घ कालावधीत पीडितेला वेळोवेळी विविध लॉजवर नेऊन तिच्यावर वारंवार अमानुषपणे अत्याचार केले. आरोपीच्या सततच्या मानसिक व शारीरिक छळाला आणि ब्लॅकमेलिंगला कंटाळून अखेर पीडित महिलेने उरुळी कांचन पोलीस ठाण्यात तक्रार दिली.
दरम्यान, उरुळी कांचन पोलीस ठाण्यात आरोपीविरुद्ध विविध कलमान्वये गुन्हा दाखल करण्यात आला असून वरिष्ठ पोलीस निरीक्षक विजयमाला पवार यांच्या मार्गदर्शनाखाली पोलीस उपनिरीक्षक नामदेव तारडे या गुन्ह्याचा पुढील सखोल तपास करत आहेत.
