जालना: महाराष्ट्रातील विविध शहरांतून महिलांवरील अत्याचाराच्या घटना समोर येत असतानाच, आता जालना शहरातून एक अतिशय धक्कादायक प्रकार उघडकीस आला आहे. एका महाविद्यालयीन तरुणीवर बलात्कार करून तिला ब्लॅकमेल करत बुरखा घालण्यास भाग पडल्याची घटना मिल्लतनगर परिसरात घडली आहे. या घटनेने जालना शहरात संतापाची लाट उसळली असून, नाशिक आणि अमरावतीमधील प्रकरणांशी याचा काही संबंध आहे का, याचा तपास आता पोलीस करत आहेत.
मिळालेल्या माहितीनुसार, महाविद्यालयात तरुणीची ओळख साहिल अन्सारी या तरुणाशी झाली. साहिलने सुरुवातीला मैत्री केली आणि नंतर “तू हो म्हणली नाही तर मी आत्महत्या करेन,” अशी धमकी देऊन तिला आपल्या जाळ्यात ओढले. पीडितेचा विश्वास संपादन केल्यानंतर त्याने तिला बुरखा घालण्यास सक्ती केली. दोन दिवसांपूर्वी आरोपीने संधी साधून तिला आपल्या घरी नेले आणि तिथे तिच्यावर बळजबरीने अत्याचार केला.
पीडितेने धीर धरून ही सर्व हकीकत आपल्या आईला सांगितली. कुटुंबाने तत्काळ कदीम जालना पोलीस ठाण्यात धाव घेत तक्रार नोंदवली. पोलिसांनी प्रकरणाचे गांभीर्य ओळखून मध्यरात्री 2 वाजता साहिल अन्सारीला त्याच्या राहत्या घरातून बेड्या ठोकल्या. आरोपी मूळचा बिहारचा असून तो येथे आपल्या कुटुंबासोबत राहतो. न्यायालयाने त्याला पाच दिवसांची पोलीस कोठडी सुनावली आहे. धक्कादायक म्हणजे, पीडितेने केलेल्या तक्रारीत तिला जातीवाचक शिवीगाळ केल्याचाही उल्लेख असल्याने पोलिसांनी यात अॅट्रॉसिटी कायद्यान्वये कलम वाढवण्याची प्रक्रिया सुरू केली आहे.
